Ispaniya 14 yillik rekordini yangiladi

Ispaniya terma jamoasi 2024 yilda barcha rasmiy musobaqalarda o‘tkazilgan 17 ta o‘yindan 14 tasida g‘alaba qozondi, bu terma jamoa tarixidagi mutlaq rekord hisoblanadi. Bu haqda “Livescore” xabar berdi.

Jamoa 19 noyabrga o‘tar kechasi o‘z uyida Shveysariyani mag‘lub etib, yangi rekord o‘rnatdi. Ispaniya terma jamoasi uchun avvalgi eng yaxshi natija 2010 yil bo‘lgan, o‘shanda jamoa 17 o‘yinning 13 tasida g‘alaba qozongan (bitta durang va uchta mag‘lubiyat). Bundan tashqari, 2010 yilda ispanlar Janubiy Afrikada o‘tkazilgan Jahon chempionatida g‘olib chiqqan.

Qayd etish joiz, Ispaniya terma jamoasi 2024 yilda Germaniyada bo‘lib o‘tgan Yevropa chempionatida g‘olib chiqqandi. Millatlar ligasida jamoa 16 ochko jamg‘arib, o‘z guruhida ishonchli g‘alaba qozondi. Ispanlar eng yaqin ta’qibchisi Daniya terma jamoasini sakkiz ochkoga ortda qoldirdi.

Ispaniya terma jamoasi uchun 2024 yildagi yagona mag‘lubiyat 23 mart kuni bo‘lib o‘tgan Kolumbiya bilan o‘rtoqlik uchrashuvida (0:1) yuz bergandi.