Ислом Махачев Чарльз Оливейрани тўхтатишга ваъда берди

Спорт

image

Енгил вазн тоифасидаги россиялик UFC жангчиси Ислом Махачев вакант чемпионлик унвони учун баҳсда Чарльз Оливейранинг ғалабали сериясига нуқта қўймоқчи. Бу ҳақда спортчининг сўзларига асосланиб, “Тhe National” нашри хабар берди.

Шунингдек, Махачев Чарлз билан жанг ҳаётидаги энг катта синов эмаслигини айтган.

“Мен хурсандман. Чунки орзуйимга ҳар қачонгидан ҳам яқинман. Чемпионлик дақиқаларигача оз қолди. Тез орада чемпион бўламан. Мен тушларимда камарни олиб, октагонга сакраб тушаман. Сабаби мен ҳеч қачон қафасга сакраб ўтирмаганман. Бу менинг орзуйим ва мен унга ҳар қачонгидан ҳам яқинроқман.

Оливейра жуда хавфли. У ҳар доим рақибларини муддатидан аввал мағлуб этади. У тик турганда ҳам, ерда ҳам хавф туғдиради. Лекин мен ўз маҳоратимга ишонаман ва бу фаолиятимдаги энг катта синов эмас деб ўйлайман. Сабаби мен кўплаб маҳоратли йигитларни урганман. Аммо ҳозир Чарльз чемпион. У яхши ғалабали серияни давом эттирмоқда ва уни ҳеч ким тўхтата олмайди, деб ҳисоблайди. 22 октябрда мен буни амалга ошираман. Мен қафасга кириб, Чарльзни тўхтатаман. Бу йигит UFC'даги энг узун ғалабали серияга эга. Менинг мақсадим унинг ғалабали сериясини тугатишдир. Мен унинг рекордини бузаман”, деган Махачев.

Қайд этиш керакки, Чарльз UFC'даги кетма-кет 11 та жангида ғалаба қозонган. Оливейра охирги мағлубиятини 2017 йилнинг 2 декабрида Пол Фельдердан қабул қилиб олган. Шундан сўнг, бразилиялик жангчи ғалабали сериясини бошлаган ва ҳозиргача умуман мағлубиятга учрамаган.

Эслатиб ўтамиз, жорий йилнинг май ойида бўлиб ўтган UFC 274 мусобақасидаги сўнгги жанги олдидан Оливейра ортиқча вазн муаммосига дуч келди ва шу сабабли чемпионлик унвонидан маҳрум қилинди. Унинг рақиби америкалик Жастин Гетжи вазн лимитини бажарган бўлса-да, Оливейрани мағлуб қила олмади. Шу сабабли чемпионлик камари вакант қолганди. 

Махачев эса узоқ давом этган ғалабали сериядан сўнг, чемпионлик унвонига даъвогар позициясига кўтарилди. UFC Fight Night 202 турниридаги сўнгги жангида Ислом америкалик Бобби Гринни биринчи раунддаёқ техник нокаут билан мағлуб этганди.

Маълумот учун, бразилиялик Чарльз Оливейра ва россиялик Ислом Махачев ўртасидаги вакант чемпионлик учун баҳс жорий йилнинг 22 октябрь куни Абу-Дабидаги UFC 280 мусобақаси доирасида бўлиб ўтади. Бу жанг ғолиби енгил вазн тоифасида UFC чемпионига айланади.


Мақола муаллифи

Теглар

Чарльз Оливейра Ислом Махачев

Баҳолаганлар

20

Рейтинг

3.1

Мақолага баҳо беринг

Дўстларингиз билан улашинг