Ирландия узоқ муддатли истиқболда барибир бирлашади – Собиқ бош вазир

Буюк Британиянинг собиқ бош вазири Гордон Браун узоқ муддатли истиқболда Ирландия бирлашиши муқаррар эканини айтди. Бу ҳақда “The Guardian” хабар берди.

Брауннинг таъкидлашича, Ирландиянинг бирлашиши “узоқ жараён” бўлиб, у томонларнинг ўзаро келишувига асосланиши керак. Унинг бу баёноти Шотландия мустақиллигига кескин қаршилиги билан ажралиб туради. Браун, шунингдек, ҳукуматда ишлаган даврида Шимолий Ирландияда тинчлик ўрнатиш жараёнида иштирок этган.

Браун 1998 йилда Жума куни келишуви имзоланган пайтда Тони Блэр ҳукуматида молия вазири бўлган. 2010 йилда эса бош вазир сифатида Шимолий Ирландия ҳокимиятига адлия ва полиция соҳасидаги ваколатларни бериш жараёнида иштирок этган.

Қайд этилишича, собиқ бош вазир Шимолий Ирландиянинг Буюк Британиянинг бошқа қисмларига нисбатан алоҳида мавқега эга эканини таъкидлаган. Ундан Шотландия мустақиллиги учун давом этаётган ҳаракат ҳақида сўралганда, Браун Шотландия бошқа мамлакатлар билан ҳамкорликда яшаш йўлини топиши кераклигини айтган.

“Шотландия географик, иқтисодий, ижтимоий ва маданий жиҳатдан Буюк Британиянинг бошқа қисмлари – Уэльс, Англия ва Ирландиянинг айрим ҳудудлари билан боғланган”, деган у.

“Ҳа. Албатта, узоқ муддатда Ирландия бирлашади”, деб жавоб берган Браун Шимолий Ирландиянинг Ирландия Республикаси билан географик яқинлиги икки ҳудуднинг бирлашишини мантиқий қиладими, деган саволга.

Унинг сўзларига кўра, бундай жараён узоқ давом этади ва одамлар бирлашиб, келишувга эришиш йўлини топиши керак.

Интервьюда Браун Буюк Британиянинг янги Бош вазири Энди Бернэмга ҳам тўхталган. У Бернэмга нима қилиш кераклиги бўйича “орқа ўриндан туриб маслаҳат беришни” истамаслигини айтган.

Шу билан бирга, Браун Шимолий денгизида нефть ва газ қазиб олишни давом эттириш тарафдори эканини билдирган. Унинг фикрича, бу қайта тикланадиган энергия манбаларига ўтишга тўсқинлик қилмайди, аксинча, мазкур соҳадаги мавжуд инфратузилма ва малакали кадрлардан янги энергетика йўналишларида фойдаланиш имконини беради.

“Сиз қайта тикланадиган энергияни Британия энергетикасининг келажаги сифатида қўллаб-қувватлашингиз ва шу билан бирга мавжуд нефть ва газ захираларидан фойдаланиш учун Шимолий денгизини ривожлантиришни ҳам қўллаб-қувватлашингиз мумкин”, деган Браун.

У Шимолий денгизидаги инфратузилмадан шамол энергетикаси, водород ишлаб чиқариш ва углеродни ушлаш ҳамда сақлаш технологияларини ривожлантиришда фойдаланиш мумкинлигини айтган.

Браун бу ўтиш жараёни Норвегия, Германия, Нидерландия, Бельгия ва Дания иштирокидаги “Европа консорциуми” орқали амалга оширилиши мумкинлигини билдирган.

Собиқ бош вазирнинг фикрича, экологик сиёсат фақат харажат сифатида эмас, балки одамлар учун манфаат келтирадиган йўналиш сифатида кўрилиши керак. У қайта тикланадиган энергия нархлари тобора арзонлашаётганини таъкидлаб, атроф-муҳитга инвестиция киритиш келажакда харажатларни тежаш имконини беришини айтган.