Инфантино 2026 йилги ЖЧни тарихдаги энг яхши турнир деб айтди

FIFA президенти Жанни Инфантино АҚШ, Канада ва Мексика мезбонлик қилаётган 2026 йилги Жаҳон чемпионатини тарихдаги энг яхши турнир деб атади. Бу ҳақда у АҚШ Президенти Донльд Трамп билан Оқ уйда бўлиб ўтган учрашув чоғида сўз очди.

“Мен сизларга ажойиб Жаҳон чемпионатини ваъда қилган эдим. Бу турнир, шубҳасиз, барча кутилмалардан ҳам ошиқроқ натижа кўрсатди. АҚШ, Канада ва Мексикадаги стадионлар мухлислар билан тўла, барча ўйинлардан хурсанд ва хотиржам баҳраманд бўлмоқда. Америка орзуси рўёбга чиқди, биз Америкада бутун дунёни бирлаштирдик”, дейди Инфантино.

Инфантино 2016 йилда FIFA президенти этиб сайланганидан буён ўтказилган ҳар бир Жаҳон чемпионатини “энг яхшиси” деб баҳолаб келади. У 2018 йилда Россияда, 2022 йилда эса Қатарда бўлиб ўтган мундиалларни ҳам энг яхши турнир сифатида эътироф этган эди.

Шунингдек, Инфантино ушбу турнирда АҚШ Президенти Дональд Трампнинг иштирокини ҳам юқори баҳолаган.

“Сизсиз бу Жаҳон чемпионати бунчалик муваффақиятли бўлмас эди. Бу нафақат тарихдаги энг буюк Жаҳон чемпионати, балки инсоният тарихидаги энг йирик ижтимоий-маданий воқеадир. Биз барчамиз ушбу тадбирнинг бир қисмига айландик ва бунинг учун сизга миннатдорлик билдирмоқчиман. Яна иккита ўйин қолган бўлса-да, аллақачон бутун дунё, Америка ва FIFA ушбу турнирдан катта фойда кўрганини айтишимиз мумкин”, дея қўшимча қилган FIFA президенти.

Тарихда илк бор FIFA Жаҳон чемпионати бир вақтнинг ўзида учта давлат – АҚШ, Канада ва Мексикада ўтказилмоқда. Шунингдек, мусобақада биринчи марта 48 та миллий терма жамоа иштирок этмоқда.

Турнир жорий йилнинг 19 июль куни Нью-Йоркда Испания ва Аргентина ўртасидаги финал учрашуви билан якунланади.