Индонезияда қариялар уйи ёниб кетди. Қурбонлар бор

Индонезиянинг Сулавеси оролида жойлашган қариялар уйида йирик ёнғин содир бўлди. Ҳодиса оқибатида камида 16 киши ҳалок бўлган. Бу ҳақда “Reuters” хабар берди.

Маълум қилинишича, “Сокин кексалар” номли қариялар уйида юзага келган ёнғин 28 декабрга ўтар кечаси содир бўлган ва кейинчалик ўчирилган. Ҳозирча ёнғиннинг келиб чиқиш сабаблари аниқланмаган.

Маҳаллий полиция вакилларидан бирининг сўзларига кўра, воқеа юзасидан тергов ҳаракатлари бошлаб юборилган.

Телеканаллар ёнғин вақтида тасвирга олинган видеолавҳаларни эфирга узатган. Шаҳар ёнғин хизмати бошлиғи Жимми Ротинсулу телеканалга берган интервьюсида қариялар уйида яшовчиларнинг аксарияти кекса ёшдагилар бўлгани сабабли бино ичида қолиб кетганини маълум қилди. Шунингдек, яна уч нафар киши турли даражадаги куйиш жароҳатлари билан шифохонага ётқизилган.

Эслатиб ўтамиз, аввалроқ АҚШда қариялар уйи ёниб кетгани ҳақида хабар берилганди.