Имомали Раҳмон икки ҳафталик танаффусдан сўнг яна кўриниш берди

Тожикистон Президенти Имомали Раҳмон икки ҳафталик изсиз йўқолишдан сўнг кеча, 16 февраль куни Душанбе шаҳрида Қозоғистон Республикаси Ташқи ишлар вазири Ермек Кошербаевни қабул қилди. Бу ҳақда Президент матбуот хизмати хабар берди.

Учрашув аввалида Президент Кошербаевнинг Тожикистонга ташрифини илиқ баҳолаб, икки давлат ўртасидаги стратегик шериклик ва иттифоқчилик муносабатларини мустаҳкамлаш ҳамда кенгайтиришга доимий эътибор қаратилишини таъкидлаган.

Кошербаев эса самимий қабул учун миннатдорлик билдириб, Имомали Раҳмоннинг Тожикистон ва Қозоғистон ўртасидаги муносабатларни барча соҳаларда ривожлантиришдаги ҳиссасини қайд этган.

Учрашув давомида икки томонлама ҳамкорликнинг ҳозирги ҳолати ва истиқболлари турли соҳаларда муҳокама қилинган. Президент муносабатларнинг ривожланишидан мамнунлигини билдириб, савдо-ижтимоий, инвестиция, маданий-гуманитар соҳалар, хавфсизлик ва бошқа ўзаро манфаатли йўналишларда мунтазам сиёсий мулоқот муҳимлигини таъкидлаган. Шу контекстда олий даражадаги учрашувлар ва алоқалар жадвали ҳам кўриб чиқилган. 

Шунингдек, халқаро ва минтақавий ташкилотлар доирасидаги кўп томонлама ҳамкорлик масалалари юзасидан фикр алмашилган.

Қайд этиш жоиз, Раҳмоннинг оммавий чиқишларсиз икки ҳафталик танаффуси ва давлат телеканалларидаги кўринмаслиги турли тахминлар ва мунозараларга сабаб бўлди. Баъзи манбалар буни таътил ёки хорижда даволаниш билан изоҳлаган, аммо расмий тасдиқ йўқ. 

74 ёшли Президентнинг соғлиғи бўйича аввал ҳам миш-мишлар тарқалган, у доимий жамоатчилик диққат марказида бўлади. Баъзи бир манбаларга кўра, Раҳмон икки ҳафта ичида Хитойга бориб даволаниб келган бўлиши мумкин, лекин бу ҳам расман тасдиқланмаган. Бунга яқин тахминлар эса бор. Масалан, 15 февраль куни Президентнинг матбуот хизмати Имомали Раҳмоннинг Хитой Раиси Си Цзиньпин учун видео табригини эълон қилди. Уч дақиқалик мурожаат Президентнинг расмий сайти, Telegram-канали ва Facebook саҳифасида жойлаштирилди.

Раҳмон Си Цзиньпинни Хитой тақвими бўйича Янги йил билан табриклаб, икки томонлама муносабатларнинг ривожланиши ва стратегик шериклик доирасидаги фаолиятдан мамнунлигини билдирди. Одатда Президент матбуот хизмати хорижий етакчиларга телеграмма табриклари юборар эди, аммо видео табрик формати деярли қўлланилмасди, лекин бу қадам Хитойга нисбатан янгича ёндашув эканини кўрсатмоқда.