“Илтимос қилманг, талаб қилинг”. Энергетика вазири тадбиркорларни ўз ҳаққини талаб қилишга чақирди

Агар тадбиркорларда ҳамма ҳужжати тўғри бўлса, улар “Электр тармоқлари”дан илтимос эмас, талаб қилиши керак. Бу ҳақда кеча, 30 июль куни Энергетика вазири Шерзод Хўжаев Тошкент вилоятининг Янгийўл туманида тадбиркорлар билан бўлиб ўтган очиқ мулоқотда сўз очди.

Энергетика вазирлигига кўра, очиқ мулоқотда Энергетика вазири Шерзод Хўжаев ҳамда туман ҳокими Санъатбек Жуманиёзов иштирок этган. Унда туманда фаолият юритаётган 27 нафар тадбиркор иштирок этиб, (17 та электр ва 6 та газ ва бошқа) электр энергияси ва табиий газ таъминоти, тармоқлардаги узилишлар, ёз ойларида электр қуввати ва қиш мавсумида газ босимининг етарли эмаслиги, электр ва газ тармоқларига уланиш учун техник шарт олиш, энергия ресурслари бўйича қарздорлик ҳамда бошқа масалалар юзасидан ўз мурожаат ва таклифларини билдирган.

Қайд этилишича, мулоқот давомида электр энергияси ва табиий газдан ноқонуний фойдаланиш ҳолатлари аниқланганда қўлланилган молиявий санкцияларни бекор қилиш ёки уларнинг миқдорини камайтириш Энергетика вазирлиги ваколатига кирмаслиги, бундай масалалар амалдаги қонунчиликка мувофиқ суд тартибида кўриб чиқилиши мумкинлиги юзасидан тушунтириш берилган.

Шунингдек, тадбиркорларга электр ва газ тармоқларига уланиш бўйича техник шартлар фақат Давлат хизматлари марказлари ёки Ягона интерактив давлат хизматлари портали (my.gov.uz) орқали электрон тарзда расмийлаштирилиши, бу каби масалаларни электр ёки газ таъминоти корхоналари ходимлари билан норасмий тартибда ҳал этишга йўл қўйилмаслиги таъкидланган.

Шу билан бирга, агар тизим ходимлари томонидан манфаат эвазига ноқонуний хатти-ҳаракатларга йўл қўйилгани ҳақида маълумотлар мавжуд бўлса, тадбиркорлардан бу ҳақда тегишли органларга ёки Энергетика вазирлигига мурожаат қилиш кераклиги айтилган. Бундай ҳолатларга нисбатан муросасиз чоралар кўрилиб, ҳуқуқни муҳофаза қилувчи органларга белгиланган тартибда тақдим этилиши маълум қилинган.

“Ҳамма ҳужжатингиз тўғри бўлса, сиз “Электр тармоқлари”дан илтимос қилманг, талаб қилинг. Бунга тўлиқ ҳаққингиз бор”, дейди Энергетика вазири.

Эслатиб ўтамиз, аввалроқ Ўзбекистонда электр ва газ таъминотидаги муаммоларни бартараф этиш ҳамда аҳолига кўрсатилаётган хизматлар сифатини яхшилаш мақсадида 15 та ҳудудда махсус штаблар ташкил этилгани ҳақида хабар берилган эди. Ҳар бир штабга энергетика тизими ташкилотлари бошлиқлари раҳбар этиб бириктирилган. Туман ҳокимлари эса штаб раҳбарларининг ўринбосари этиб белгиланган. Хусусан, Янгийўл туманига Энергетика вазири Шерзод Хўжаевнинг ўзи раҳбарлик қилмоқда. У олдинроқ Энергетика вазири лавозимидан озод этилган Жўрабек Мирзамаҳмудовнинг ўрнини эгаллаган эди.