Илон Маск сиёсатга қайтишга қарор қилди – ОАВ

АҚШ Конгресси учун бўлиб ўтадиган сайловлар арафасида Илон Маск сиёсий фаоллигини кучайтириб, республикачиларни молиялаштиришни қайта бошлади. Бу ҳақда “The Wall Street Journal” хабар берди.

Нашрнинг ёзишича, америкалик миллиардер яна республикачиларга йирик хайриялар ажратишни бошлаган ҳамда АҚШ Президенти Дональд Трамп билан муносабатларини тиклаган. Бу ҳолат 2026 йил ноябрида ўтказиладиган Конгрессда оралиқ сайловлар билан боғланмоқда.

Маълумотларга кўра, йил бошидан буён Илон Маск республикачи Нейт Морриснинг сайлов кампаниясини қўллаб-қувватлаш учун 10 млн доллар йўналтирган. Узоқ йиллик сенатор Митч Макконнелл сиёсатдан кетганидан сўнг Моррис Кентукки штатидан сенатор бўлиш учун номзод сифатида кўрилмоқда.

“Миллиардернинг сиёсий стратегиясини унинг сиёсий технологи Крис Янг мувофиқлаштирмоқда. Жамоа рақамли кампаниялар ва хабарлар орқали ташвиқот олиб борувчи пудратчилар билан музокаралар олиб бормоқда ҳамда эҳтимолий кенг кўламли кампанияга тайёргарлик кўрмоқда”, дейилади мақолада.

Қайд этилишича, Маскнинг сайлов жараёнидаги иштироки формати бўйича якуний қарор ҳали қабул қилинмаган. У 2024 йилда Трампнинг сайлов кампаниясини қўллаб-қувватлаш учун ташкил этилган America PAC орқали молиялаштиришни ҳам, бошқа сиёсий қўмиталар ва алоҳида сайлов пойгаларига сармоя киритишни ҳам кўриб чиқмоқда.

Нашрнинг қўшимча қилишича, 2024 йилдаги президентлик сайлов кампанияси вақтида Маск Трамп ҳамда республикачиларни қўллаб-қувватлаш учун қарийб 300 млн доллар сарфлаган ва АҚШдаги энг йирик маълум сиёсий донор сифатида қайд этилган. 2025 йил июнидан буён эса унинг хайриялари атиги 42 млн долларни ташкил қилган.

Эслатиб ўтамиз, 2025 йил ёзида Илон Маск АҚШ Президенти Дональд Трамп билан жанжаллашиб қолган эди. Бунга Трамп илгари сурган “Катта, чиройли қонун” сабаб бўлган. Маск агар қонун қабул қилинса, ўз партиясини тузишини айтган. Бунга жавобан Трамп “Илон бутунлай йўлдан чиқди” деган эди. Кейинчалик Маск миллиардер Жеффри Эпштейн иши бўйича Трампни яна тилга олган. Трамп эса Маскнинг республикачиларга қайтишдан бошқа чораси йўқлигини таъкидлаган. Ўтган йил сентябрь ойида эса Дональд Трамп ва Илон Маск Чарли Кирк хотирасига бағишланган маросим бўлиб ўтган стадионда бирга кўринган. Можародан сўнг илк бор сиёсатчи ва бизнесмен бир-бири билан қўл бериб кўришган.