Илон Маск Optimus роботларидан армия тузмоқчи

Tesla компаниясининг бош директори ва миллиардер Илон Маск йил охиригача 5 мингта Optimus роботлари ишлаб чиқарилишини ва улардан иборат армия тузилишини эълон қилди. Бу ҳақда у X ижтимоий тармоғидаги жонли эфири чоғида сўз очди.

Tesla’нинг чораклик натижаларига бағишланган тақдимотда Маск агар компания режалаштирилган 10 минг нусханинг ярмини амалга ошира олса, буни катта ютуқ деб билишини таъкидлаган. Шунингдек, у 5 мингта робот – турли даврларда 2 мингдан 10 минггача жангчидан иборат бўлган Рим легионига тенг келишини қўшимча қилган.

“Ўйлайманки, биз том маънода легион қурамиз: ҳеч бўлмаганда, бу йил битта легион роботлар ишлаб чиқарамиз, кейин эса, эҳтимол, келаси йили ўн легион”, деди Илон Маск.

Унинг сўзларига кўра, роботлар ишлаб чиқариш Tesla учун бутунлай янги йўналиш бўлиб, компания муқаррар равишда хатоларга дуч келмоқда.

Бироқ Маск бу роботларни Tesla’нинг энг истиқболли активларидан бири деб атаган ва атроф-муҳитни идрок қила оладиган ва топшириқларни бажара оладиган интеллектуал одамсимон роботларни ишлаб чиқариш муҳимлигини ортиқча баҳолаш қийин эканини таъкидлаган.

Эслатиб ўтамиз, аввалроқ Илон Маск “Fox News” телеканалига берган интервьюсида SpaceX компанияси 20-30 йил ичида Марсда ҳеч қандай Ер ёрдамисиз яшай оладиган цивилизация яратишни режалаштирганини айтган эди.