Грета Тунберг Лондонда ҳибсга олинди

Бугун, 23 декабрь куни швециялик экофаол Грета Тунберг Лондонда Palestine Action ҳаракатини қўллаб-қувватлаш акцияси чоғида ҳибсга олинди. Бу ҳақда “Sky News” хабар берди.

Телеканал маълумотига кўра, 22 ёшли экофаол Грета Тунберг акция давомида “Мен Palestine Action маҳбусларини қўллаб-қувватлайман. Мен геноцидга қаршиман”, деган ёзувли плакатни кўтариб турган. Норозилик акцияси Лондон марказида, Aspen Insurance суғурта компанияси офиси олдида бўлиб ўтган. Намойишчилар айнан шу жойни танлаган, чунки мазкур компания Исроил билан боғлиқ Elbit Systems мудофаа компаниясига суғурта хизматлари кўрсатади.

Телеканал хабарига кўра, икки нафар фаол бино фасадини қизил бўёқ билан бўяган, шундан сўнг воқеа жойига полиция етиб бориб, иштирокчиларни қўлга олган.

Маълумот учун, Palestine Action ҳаракати Буюк Британияда тақиқланган бўлиб, бунга ҳаракат фаолларининг Оксфордшир графлигидаги Британия Ҳарбий-ҳаво кучларининг энг йирик базаси – Брайз-Нортон авиабазасига бостириб кириб, иккита Airbus Voyager ёнилғи қуйиш самолётини лом билан шикастлагани ва уларнинг турбиналарига қизил бўёқ сепгани сабаб бўлган. Фаолларнинг баёнотига кўра, бу акция Британия ҳарбий ҳаво кучларининг Брайз-Нортондан Кипрдаги Акротири базасига ҳар куни амалга ошираётган парвозларига қарши норозилик сифатида ўтказилган, чунки мазкур база Ғазодаги ҳарбий операцияларда иштирок этмоқда.

Ҳозирда ушбу ҳаракатга аъзолик ёки уни қўллаб-қувватлаш жиноят ҳисобланади ва 14 йилгача озодликдан маҳрум этиш билан жазоланиши мумкин. Defend Our Juries ташкилотига мансуб “адолат тарафдорлари” эса мунтазам равишда Palestine Action’ни қўллаб-қувватлаш мақсадида оммавий акциялар ўтказиб, полиция ва суд тизимининг тақиқни самарали амалга ошириш имкониятларини чеклашга уринмоқда.

Ҳаракатнинг бир гуруҳ фаоллари жорий йил 2 ноябрь – 1917 йилда Буюк Британия Ташқи ишлар вазири Артур Бальфур британиялик яҳудийлар етакчиси Уолтер Ротшильдга Фаластинда яҳудий давлати тузиш ташаббусини қўллаб-қувватлаш ҳақидаги мактубни йўллаган сана – “Бальфур куни”да очлик акциясини бошлаган. Улардан икки нафари кеча, 22 декабрь куни шифохонага ётқизилган.

Эслатиб ўтамиз, жорий йилнинг октябрь ойи бошида Грета Тунберг Ғазога кетаётган ўнлаб кемалардан иборат халқаро “Global Sumud” флотилияси билан бирга Исроил томонидан ҳибсга олинган эди. Тунберг 6 октябрь куни турли миллатга мансуб 70 дан ортиқ ҳибсга олинганлар билан Исроилдан депортация қилинди.