Гренландия можароси. ЕИ АҚШга жавобан бож жорий қилмоқчи

Европа Иттифоқи мамлакатлари Президент Дональд Трампнинг Гренландияни қўллаб-қувватловчи мамлакатларга нисбатан божлар жорий этиш таҳдидлари туфайли АҚШдан 93 миллиард евро (108 миллиард доллар) миқдоридаги товарларга божлар ёки Америка компаниялари учун бир қатор чекловлар жорий этишни кўриб чиқмоқда. Бу ҳақда “Financial Times” хабар берди. 

“Европа пойтахтлари Дональд Трампнинг Гренландияни сотиб олиш кампаниясига қарши чиқаётган НАТО иттифоқчиларига таҳдидларига жавобан АҚШга 93 миллиард евролик товарларга божлар жорий этиш ёки Америка компанияларининг иттифоқ бозорига киришини чеклаш имкониятини кўриб чиқмоқда”, деб ёзади газета. 

Вазиятдан хабардор амалдорнинг сўзларига кўра, Европа Иттифоқи келаси ҳафта Давосда бўлиб ўтадиган Халқаро иқтисодий форум доирасида Европа етакчилари ва Трамп ўртасидаги учрашувда иттифоқ етакчиларига устунлик бериш учун жавоб чораларини кўришни режалаштирмоқда. 

Қайд этилишича, эҳтимолий божлар рўйхати 2025 йилда тайёрланган, бироқ савдо урушини бошлашни истамай, уни кўриб чиқиш жорий йилнинг февралига қолдирилган. Кеча, 18 январь куни Брюсселда бўлиб ўтган учрашувда Европа Иттифоқининг доимий вакиллари айнан шу рўйхатни муҳокама қилган. Шунингдек, улар Америка компанияларининг Европа Иттифоқи бозорига киришини чеклаши мумкин бўлган “мажбурлашга қарши восита”дан фойдаланишни кўриб чиққан. 

Суҳбатдошлардан бирининг газетага айтишича, Европа Иттифоқининг кўплаб аъзолари мажбурлашга қарши воситани фаоллаштиришни қўллаб-қувватлаган, бироқ кўпчилик барибир Трамп билан мулоқот тарафдори бўлган. 

Хабарда айтилишича, Европа расмийлари жавоб божлари таҳдидлари Трампга Американинг иккала партияси томонидан босимнинг кучайишига олиб келишига ва натижада у Европа давлатларига нисбатан чоралар кўриш ғоясидан воз кечишига умид қилмоқда. 

Эслатиб ўтамиз, АҚШ Президенти Truth Social ижтимоий тармоғида февраль ойидан бошлаб Гренландиянинг тегишлилиги масаласида Данияни қўллаб-қувватловчи бир қатор Европа давлатларига нисбатан божлар жорий этишини ёзган эди. 

“2026 йил 1 февралдан бошлаб бу мамлакатларнинг барчаси – Дания, Норвегия, Швеция, Франция, Германия, Буюк Британия, Нидерландия ва Финляндия АҚШга юбориладиган барча товарлар учун 10 фоизлик бож тўлайди”, деди Трамп.