Германиялик спортчи қиз Холандни югуриш пойгасида мағлуб этмоқчи

Германиялик машҳур спортчи Алиса Шмидт Англиянинг “Манчестер Сити” клуби ва Норвегия терма жамоаси ҳужумчиси Эрлинг Холанд билан югуриш мусобақасида баҳс олиб бормоқчи. Бу ҳақда енгил атлетикачи “Dagbladet”га берган интервьюсида айтиб ўтди.

“400 метрга югуришда мен Эрлингдан устун келишим мумкин, бироқ 200 метрда бу вазифани уддалаш қийин бўлади. Холандга қарши баҳс олиб боришни жуда хоҳлардим. Эҳтимол, мен унга таклифнома юборишим керакдир. Холанд, агар сен мен билан баҳслашишга тайёр бўлсанг, қайси биримиз тезкорроқ эканлигимизни текшириб кўрамиз”, дейди Шмидт.

Шмидт 2020 йилда Дортмунднинг “Боруссия” клубининг фитнес мураббийи бўлиб ишлаган. У тез-тез футболчилар билан спринтерлик пойгаларида қатнашиб туради. Ҳатто Германия терма жамоасининг марказий ҳимоячиси Матс Хуммельс билан 400 метр масофага ўтказилган пойгада футболчини мағлуб этган.

19 август куни германиялик спортчи жамоаси таркибида Будапештда ўтказилаётган енгил атлетика бўйича жаҳон чемпионатининг 4х400 м эстафетасида иштирок этган.