Германияда йўловчи поезди рельсдан чиқиб кетди. Қурбонлар бор (видео)

Кеча, 27 июль куни Германия жануби-ғарбида йўловчи поезди рельсдан чиқиб кетди. Ҳодиса оқибатида камида 4 киши ҳалок бўлган, 34 киши жароҳат олган. Бу ҳақда “Schwäbische” газетаси хабар берди.

Расмий маълумотларга кўра, уч нафар йўловчи оғир аҳволда шифохонага ётқизилган. Ҳалокат сабаби рельсга тушган кўчки билан боғлиқ бўлиши мумкин. Поезд ҳалокатидан олдин ушбу ҳудудда кучли довул ва ёмғир кузатилган. Ридлинген ва Мундеркинген ўртасидаги темирйўл линиясида ҳаракат тўхтатилган.

“Bild” нашри маълумотларига кўра, ҳалокат 55-рақамли, Ульм томон ҳаракатланаётган поезд билан юз берган. Жадвалга кўра, у соат 17:33 да Зигмарингендан йўлга чиққан бўлиб, Менген ва Хербертингенда тўхташи керак бўлган. Поезднинг олд қисми чап томонга рельсдан чиқиб кетган.

Эслатиб ўтамиз, аввалроқ Россиянинг Курск вилоятида темирйўл кўприги поезд билан биргаликда қулаб тушганди. Ҳодиса оқибатида 1 киши жароҳатланган.