Германияда ишсизлик даражаси рекорд даражага етди

Германияда ишсизлик даражаси тарихий энг юқори кўрсаткичга етди. Бу ҳақда кеча, 30 январь куни Германия Федерал бандлик агентлиги ўз расмий сайтида маълум қилди.

Маълум қилинишича, 2026 йилнинг январь ойида Германияда ишсизлар сони 3 миллион кишидан ошган. Бу кўрсаткич 2025 йил декабрига нисбатан 177 минг кишига кўп.

Агентлик раиси Андреа Налеснинг айтишича, йил бошида мавсумий сабаблар туфайли ишсизлик даражаси сезиларли даражада ошган ва яна 3 миллион чегарасидан юқорига чиққан. У 2026 йил бошида Германия меҳнат бозори паст фаоллик билан тавсифланаётгани, ишсизликнинг кескин ўсиши асосан мавсумий омиллар билан боғлиқ эканини тушунтирган. Шунингдек, иш қидираётган барча одамлар учун вазият ҳануз мураккаблигича қолаётганини таъкидлаган.

Агентлик маълумотларига кўра, бандлик хизматларида рўйхатдан ўтган бўш иш ўринлари сони 598 мингтагача камайган. Бу 2025 йилнинг шу даврига нисбатан 34 мингтага кам. Ишсизлик даражаси декабрь ойига қараганда 0,4 фоиз пунктга ошиб, 6,6 фоизга етган. Мутахассислар айниқса ёшларга эътибор қаратган: 2026 йил январь ойида тахминан 41 минг нафар университет ва коллеж талабалари амалиёт ва иш топа олмаган.

Экспертлар ишсизликнинг ўсишини Германия иқтисодиётидаги умумий секинлашув ва айрим тармоқларда мавсумий равишда иш ўринларининг қисқариши билан боғламоқда.