Германия Жаҳон чемпионатидан чиқиб кетмоқчи

Германия 2026 йилги Жаҳон чемпионатини бойкот қилиш масаласини жиддий кўриб чиқмоқда. Мамлакат футбол ассоциацияси турнирдан чиқиш эҳтимолини ҳозирча юқори деб баҳоламоқда. Бу ҳақда Topskills Sports UK хабар берди.

Қайд этилишича, Берлин бу борада Мадрид билан ҳамкорликда ҳаракат қилмоқчи. Агар Испания ҳам турнирда иштирок этмасликка қарор қилса, Германия ҳам шундай йўл тутиши мумкин.

Мазкур жараённинг асосий ташаббускорларидан бири Германия канцлери Фридрих Мерц экани айтилмоқда. У АҚШ ташқи сиёсатини кескин танқид қилиб, Вашингтон қоидаларга асосланган халқаро тартибдан воз кечиб, кўпроқ куч ва миллий манфаатларга таянаётганини таъкидлаган.

Шу тариқа, 2026 йилги Жаҳон чемпионати атрофидаги кескинлик тобора кучайиб, спорт доирасидан чиқиб кетаётганига эътибор қаратилмоқда. Агар Европанинг етакчи терма жамоаларидан бўлган Германия ва Испания турнирда қатнашишдан бош тортса, бу бошқа мамлакатларга ҳам таъсир қилиб, FIFA учун катта инқирозни юзага келтириши мумкин.

Эслатиб ўтамиз, аввалроқ Яқин Шарқдаги воқеалардан сўнг Эрон футбол федерацияси президенти Меҳди Тож Эрон терма жамоаси 2026 йилги футбол бўйича Жаҳон чемпионатида иштирок этмаслигини маълум қилганди.