Германия разведкасининг собиқ раҳбари жосусликда гумонланмоқда – “Bild”

Германия Федерал разведка хизматининг (BND) собиқ раҳбари Август Ҳаннинг жосусликда гумонланиб ҳибсга олинди. Бу ҳақда “Bild” хабар берди.

Нашр маълумотларига кўра, Германия разведкасининг собиқ раҳбари давлат сирини ташкил этувчи маълумотларни йиғишда, шунингдек, давлатга хоинлик қилиш ва хорижий мамлакат фойдасига жосуслик қилишда гумонланмоқда.

“Ҳаннинг BND раҳбарият штабининг яқинда истеъфога чиққан ходимидан махфий маълумотларни “кейинчалик қайта сотиш” мақсадида сотиб олган. Ҳаннинг ва унинг эҳтимолий шеригига нисбатан терговни федерал бош прокурор олиб бормоқда”, дейилади хабарда.

Қайд этилишича, Ҳаннинг 1998 йилдан 2005 йилгача BND’га раҳбарлик қилган – бутун дунё бўйлаб хавфсизлик ва бизнес соҳаларида консультант сифатида фаолият юритган. У, шунингдек, Россия ва Хитой билан, жумладан, ушбу мамлакатларнинг давлат тузилмалари билан алоқаларга эга бўлган.

Сўнгги вақтларда у кузатув кенгаши аъзоси бўлган Болтиқбўйи мамлакатларидаги банкнинг касодга учраши сабабли молиявий қийинчиликларни бошдан кечираётган бўлган.

Эслатиб ўтамиз, аввалроқ АҚШ Федерал қидирув бюроси (ФҚБ) Калифорнияда яшовчи 34 ёшли аёлни Хитой расмийлари топшириғига биноан Тайвань Президенти Лай Циндэнинг ўғилларидан бирини кузатганликда айблаб, ҳибсга олганди.