Германия канцлери Нетаньяхуни ҳибсга олмасликка ваъда берди

Исроил Бош вазири Биньямин Нетаньяху, Халқаро жиноий суд (ХЖС) томонидан ҳибсга олишга ордер чиқарилганига қарамай, Германияга ташриф буюриши мумкин. Бу ҳақда Германия канцлери Фридрих Мерц кеча, 14 май куни Берлинда БМТ Бош котиби Антониу Гутерриш билан бўлиб ўтган учрашуви якунлари бўйича айтиб ўтди.

“Асосан, Исроил Бош вазири Германияга келиш имкониятига эга бўлиши керак”, деган Фридрих Мерц.

Канцлернинг аниқлик киритишича, Нетаньяхунинг Германияга ташрифи ҳозирча режалаштирилмаган.

“У (Биньямин Нетаньяху) бутун минтақадаги ягона демократик мамлакатнинг демократик йўл билан сайланган Бош вазиридир. Бу Бош вазир Германияга келиш имкониятига эга бўлиши керак. Агар бу режалаштирилган бўлса, сизга буни қандай қилиб амалга оширамиз ҳақида ўз вақтида хабар берамиз”, деди Германия ҳукумати раҳбари. 

“Welt”нинг эслашича, Германия Бундестагига 23 февралда бўлиб ўтган навбатдан ташқари сайловлар куни ўша пайтдаги консерватив ХДИ/ХСИ блокидан Германия канцлери лавозимига номзод бўлган Фридрих Мерц Биньямин Нетаньяхуга қўнғироқ қилиб, агар Германияга ташриф буюрса, ХЖC буйруғи асосида ҳибсга олинмасликнинг “йўллари ва воситалари топилади” деб ваъда берган эди. Ўша пайтда бу Германия социал-демократик партияси (СДП) ва чап партиянинг норозилигига сабаб бўлди.

ХЖС 2024 йил 21 ноябрда Нетаньяхуни ҳибсга олиш учун ордер берди. Суд Нетаньяхуни Ғазо секторида Исроил содир этган ҳарбий жиноятлар ва инсониятга қарши жиноятлар учун жавобгар деб ҳисоблаш учун етарли асослар борлигини аниқлади.

Германия ва ХЖС юрисдикциясини тан олган бошқа давлатлар Нетаньяху келган тақдирда уни ҳибсга олишга мажбур. Айни пайтда, Исроил, шунингдек, Қўшма Штатлар ва бошқа баъзи давлатлар ХЖСнинг асосий ҳужжати бўлган Рим статутига қўшилмаган.

Жорий йил апрель ойида Нетаньяху Венгрияга ташриф буюрган ва у ерда ҳибсга олинмаган. Шундан сўнг мамлакат Бош вазири Виктор Орбан Исроил Бош вазири билан бирдамлик билдирди. Апрель ойининг охирида Венгрия парламенти мамлакатни Гаагадаги ХЖС юрисдикциясидан олиб чиқиш учун овоз берди.