Футболчига ўриндиқ бўлагини улоқтирган мухлис қамалди

Шотландиянинг “Абердин” жамоаси мухлиси футболчига ўриндиқ бўлагини улоқтириб, унга тан жароҳати етказгани учун 18 ой муддатга озодликдан маҳрум этилди. Бу ҳақда “The Herald” хабар берди.

Манбага кўра, ҳодиса ўтган йилнинг 17 май куни “Абердин” жамоасининг “Таннадис” стадионида “Данди Юнайтед”га қарши сафар учрашувида 1:2 ҳисобида мағлуб бўлганидан сўнг содир бўлган. Мағлубиятдан норози мухлис 32 ёшли Дэвид Гоуванс майдонга ўриндиқнинг бир қисмини улоқтирган. Ушбу буюм “Абердин” ҳимоячиси Жек Маккензининг бошига тегиб, футболчига жиддий жароҳат етказган.

Суд қарорига мувофиқ, Дэвид Гоуванс 18 ой муддатга қамоқ жазосига ҳукм қилинди. Шунингдек, унга 10 йил давомида футбол учрашувларига бориш тақиқланди. Қайд этилишича, у аввалроқ “Абердин” футбол клуби томонидан ҳам умрбод мухлисликдан четлатилган.

Гоуванснинг адвокати Ларри Флинн суд жараёнида мижози ҳодиса вақтида маст бўлганини ҳамда содир этилган иш учун “жуда қаттиқ хижолат” тортаётганини маълум қилган.