Франциядаги можаро фонида Дуров Ўзбекистонни мақтади (видео)

Telegram асосчиси Павел Дуров Ўзбекистонга ташриф буюргани ва бундан мамнун эканини айтди. Бу ҳақда у америкалик журналист Такер Карлсонга берган интервьюсида сўз очди.

Дуров интервьюда Францияда юз берган ҳибсга олиниши воқеасини шарҳларкан, Ўзбекистонга қилган сафарини ҳам эсга олган. У ҳибсга олинишини нафақат шахсий адолатсизлик, балки Франция ҳукуматининг обрўсига ҳам зарба деб атаган.

“Бундай қарорлар фақат қариндошларим, компаниям ёки мен учун эмас, балки бутун Франция учун зарарли”, дейди у.

Дуров, шунингдек, доимий равишда Франция ҳукумати билан ҳамкорликка очиқ бўлганини айтиб, юз берган воқеани “ўз одамингга қарата отилган ўқ” деб таърифлаган.

Шунингдек, суҳбатда бу каби воқеаларнинг бизнес вакилларининг Европага муносабатига қандай таъсир қилаётгани ҳақида ҳам гап кетган. Дуровнинг айтишича, унинг кўплаб танишлари – йирик ва кичик компаниялар раҳбарлари энди Францияга бориш хавфсизми, деган савол устида бош қотиряпти.

“Менинг бир танишим, стартап раҳбари: “Мен бу ерга келишдан қўрқардим” деди”, дейди Telegram асосчиси.

Шу фонда Такер Карлсон кутилмаганда Ўзбекистонни тилга олиб, уни собиқ совет республикалари ҳақидаги стереотипларга зид ҳолда хавфсиз деб атаган. У Ўзбекистонда шахсан бўлмаганини, бироқ ушбу мамлакат ҳақида бирорта ҳам салбий фикр эшитмаганини таъкидлаган.

“Мен Ўзбекистонни реклама қилаётганим йўқ. Лекин ҳали бирорта одамни учратмадимки, у “мен Ўзбекистонга боришдан қўрқяпман”, деган бўлса”, дейди Карлсон.

Дуров эса бунга жавобан ўтган йили ёзда Ўзбекистонда бўлганини ва сафардан мамнун бўлганини айтган.

“Мен бу фактни (яъни одамлар Ўзбекистондан қўрқмаслигини) ҳатто билмасдим. Аммо гап айнан шунда. Болалигимизда примитив ёки ишлар қонун эмас, балки монарх истагига қараб юрадиган тизим сифатида қабул қилинган айрим давлатлар кейинчалик кўринадики, улар сенга, менга ёки инсон ҳуқуқларига ишонадиган ҳар қандай оддий инсонга нисбатан жуда нормал муносабатда бўлади. Аммо Франция ёки Буюк Британия – бу бошқа масала”, дея фикрини якунлаган Карлсон.

Эслатиб ўтамиз, Павел Дуров ўтган йили 24 август куни кечқурун Париж аэропортида қўлга олинган. Франция ҳукумати Дуровни ҳибсга олиш учун ордерни 2024 йил 25 мартда берган. Шу билан бирга, унинг акаси, Telegram асосчиси Николай Дуровни ҳибсга олиш учун ҳам ордер берилганди. Ҳибсга олиш учун ордерлар “вояга етмаганларнинг порнографик тасвирларига эгалик қилиш, тарқатиш ёки улардан фойдаланишни таклиф қилишда иштирок этганлик” учун чиқарилган.  

26 август куни тушдан кейин Франция прокуратураси 12 та жиноят бўйича номаълум шахсларга нисбатан тергов ҳаракатлари олиб борилаётгани ҳақида пресс-релиз эълон қилди. Улар орасида ваколатли органлар сўровига кўра маълумот беришдан бош тортиш, вояга етмаганларнинг порнографик тасвирларини сақлашга шериклик, гиёҳванд моддаларни тарқатишда иштирок этиш, хакерлик дастурларини тарқатишда иштирок этиш кабилар бор.  

28 август куни Дуров Парижда ҳибсдан 5 миллион евро гаров эвазига озод қилинди. Унга Франциядан чиқиб кетиш тақиқланди ва ҳафтасига икки марта полицияга хабар бериб туриши шарти қўйилди.

Кейинроқ эса Дуров ҳозиргача Францияни тарк эта олмаганидан ажабланаётгани ва бундан норози эканлигини маълум қилди.