Францияда оммавий тартибсизликлар: ҳокимият бинолари ва дўконларга ўт қўйилди

Олам

−

12:22 visibility1110 timer2 дақиқа

Францияда яшаш харажатларининг ошиши ва ижтимоий тенгсизликка қарши ўтказилган оммавий намойишлар тартибсизликлар келтириб чиқарди. Айрим шаҳарларда давлат бинолари ва дўконларга ҳужум қилиниб, полиция билан тўқнашувлар юз берди. Бу ҳақда “Reuters” хабар берди.

Қайд этилишича, кеча, 17 октябрь куни мамлакатнинг кўплаб шаҳарларида юз минглаб одамлар намойишга чиққан. Франция Ички ишлар вазири Лоран Нуньес намойишчилар сонини 550 минг деб баҳолаган бўлса, CGT касаба уюшмаси эса 800 минг киши қатнашганини билдирган.

Намойишларнинг айримлари зўравонликларга айланиб кетган. Жумладан, Лимож шаҳрида шаҳар ҳокимияти биносига ўт қўйилган, Марселда намойишчилар ҳокимият биносига бостириб кириб, деворларда ёзувлар қолдирган. Лион шаҳрида эса сайёҳлик идораси ёқиб юборилган.

Парижда тартибсизликлар иштирокчилари Galeries Lafayette савдо марказига киришга уринган, банкларга зарар етказган, Lacoste дўконини талаб, бошқа савдо нуқталарига ҳужум қилган. Айрим жойларда автомобилларга ҳам ўт қўйилган.

Франция Бош вазири Себастьян Лекорню ҳукумат зўравонликлардан қўрқиб, босимга ён бермаслигини билдирган. У тартибсизликларда ўта сўл гуруҳлар ва жиноятчиларни айблаган. Президент Эммануэль Макрон эса ҳужумларни амалга оширганлар жавобгарликка тортилишини маълум қилган.

Бош вазирнинг айтишича, намойишлар давомида 1 200 киши қўлга олинган. Шунингдек, 150 нафардан ортиқ полиция ходими жароҳатланган. Тўқнашувларда бир кишининг қўли узилиб кетган.

Франция оммавий ахборот воситалари унинг полиция ишлатган шовқинли гранатани олишга уринганини ёзган.

Намойишчилар норозилик сабабларини яшаш харажатларининг қимматлашиши, ёқилғи нархининг ошиши, ўқитувчилар етишмаслиги ва мактаблардаги шароитларнинг ёмонлиги билан изоҳлаган.

Қайд этиш жоиз, намойишлар ўтган ой Парижнинг шимолий чеккаларидаги мактабларда бошланганди. Дастлаб таълим шароитларини яхшилаш талаби билан бошланган ҳаракат кейинчалик давлат харажатлари, ижтимоий тенгсизлик ва аҳолининг турмуш даражаси билан боғлиқ норозиликларни ҳам қамраб олган.

Шунга ўхшаш норозилик намойишлари кеча, 17 октябрь куни Бельгия, Португалия ва Италияда ҳам бўлиб ўтган. Албанияда эса намойишчилар ҳукуматдаги коррупция, иш ўринлари етишмаслиги ва таълим сифатидан норозилик билдирган.