Францияда намойишчилар 2 мингдан ортиқ дўконни тўнади

Францияда яшаш нархининг ошишига қарши намойишлар оммавий тартибсизликларга айланиб, мамлакат бўйлаб 2 мингдан ортиқ дўкон талон-торож қилинди. Етказилган зарар юзлаб миллион евро деб баҳоланмоқда. Бу ҳақда “Euronews” хабар берди.

Қайд этилишича, жорий йилнинг 17 октябрь куни Франция бўйлаб қарийб 500 минг киши турмуш харажатларининг қимматлашишига қарши кўчага чиққан. Бироқ намойишлар мамлакатда сўнгги йилларда кузатилган энг йирик тартибсизликлардан бирига айланган. Айрим шаҳарларда маъмурий бинолар ва дўконларга ҳужум қилинган, улар талон-торож қилиниб, ёнғинлар содир этилган.

Парижда юзларини ниқоб билан беркитган, қора кийимдаги ёшлар дўконларнинг металл тўсиқларини бузиб, ичкарига кирган. Улар сигареталар, кўзойнаклар, кийим-кечак, заргарлик буюмлари ва озиқ-овқат маҳсулотларини олиб кетган. Айрим дўконларда кассалар ҳам синдирилган.

Тартибсизликларда иштирок этган айрим ёшлар ижтимоий тармоқларда талон-торож қилинган буюмлар билан мақтаниб, полиция билан тўқнашувлар ҳақида видеолар жойлаган. Улардан бири TikTok’даги видеосида спорт кийимлари дўконидан Under Armour брендига тегишли янги кийим олганини айтган. У полиция ходимларини ҳам масхара қилиб, “Биз ҳаммасини вайрон қилдик“, дея мақтанган.

Бошқа бир йигит эса намойишда ёқилғи нархлари ошгани сабабли иштирок этганини, спорт дўконидан кийим-кечак ва бошқа маҳсулотларни олиб чиққанини айтган. Унинг айтишича, талон-торож қилиш орқали пулни тежаш мумкин. Шу билан бирга, у Францияда ирқчилик борлигини иддао қилган.

Франция Ички ишлар вазири Лоран Нуньес кеча, 19 октябрь куни полиция айрим йирик шаҳарларда вазият устидан назоратни йўқотганини тан олган. Унинг айтишича, юзлаб дўконлар талон-торож қилинганидан кейин савдогарларга вазият назорат остида бўлганини айтиш қийин.

Вазир хавфсизлик кучларини сафарбар этишда вазиятни олдиндан баҳолаш ва зарур чораларни кўриш борасида камчиликларга йўл қўйилганини ҳам қайд этган. Унинг маълум қилишича, 17 октябрь куни мамлакат бўйлаб қарийб 60 минг полиция ходими ва жандарм хизмат олиб борган. Бироқ бу кучлар намойишлар атрофида тўпланган катта гуруҳларни назорат қилиш учун етарли бўлмаган.

Лоран Нуньес етказилган зарарни инобатга олиб, истеъфога чиқишга тайёрлигини билдирган. Аммо Франция Президенти Эммануэль Макрон унинг истеъфосини қабул қилмаган.

Минглаб киши ҳибсга олинди

Франция Адлия вазири Жеральд Дарманеннинг маълум қилишича, дам олиш кунлари тартибсизликлар билан боғлиқ ҳолатлар юзасидан 2 минг 330 нафардан ортиқ киши полиция назоратига олинган. Уларнинг 70 фоизини вояга етганлар ташкил этади.

Тартибсизликлар оқибатида хавфсизлик кучларининг қарийб минг нафар ходими жароҳатланган. Намойишчилар орасида ҳам жароҳатланганлар бор. Улардан бирининг қўли полиция томонидан оммавий тартибсизликларни бартараф этиш учун қўлланган махсус граната портлаши оқибатида узилиб кетган.

Франция Савдо-саноат палатаси раҳбари Ален Ди Кресченцонинг баҳолашича, мамлакат бўйлаб 2 мингдан ортиқ савдо нуқтаси зарар кўрган. Етказилган моддий зарар юзлаб миллион еврони ташкил этиши мумкин.

Эслатиб ўтамиз, аввалроқ Франция пойтахти Парижда намойишчилар яшаш харажатларининг ошишига қарши норозиликларни қўллаб-қувватлаш мақсадида Лувр музейига кириш йўлларини тўсиб қўйгани ҳақида хабар берилган эди.