Францияда Эбола аниқланган илк бемор соғайди

Францияда Эбола вируси аниқланган илк бемор тўлиқ соғайиб, шифохонадан чиқарилди. Бу ҳақда “France 24” хабар қилди.

Қайд этилишича, бемор шифокор бўлиб, у жорий йилнинг 23 июнь куни Конго Демократик Республикасидан Францияга қайтганидан сўнг топширган тест натижаси мусбат чиққан. Шундан сўнг у махсус тиббий муассасага ётқизилиб, даволанишни бошлаган.

Расмийларнинг билдиришича, шифокор соғайган ва 5 июль куни шифохонадан чиқарилиб, уйига қайтган. Мазкур ҳолат Франция ҳудудида қайд этилган илк Эбола инфекцияси ҳисобланади. Гарчи 2014 йилда Ғарбий Африкадаги эпидемия даврида икки нафар бемор Францияга олиб келинган бўлса-да, уларга ташхис мамлакат ташқарисида қўйилган.

Маълум бўлишича, бемор Air France рейси орқали Францияга учиб борган. Унда бош оғриғидан ташқари деярли ҳеч қандай аломат кузатилмаган. Эҳтиёт чораси сифатида у билан бир рейсда бўлган яна беш йўловчи ҳам кузатувга олиниб, изоляция қилинган. Шифокор фаолият юритадиган Халқаро тиббий ҳаракатлар альянси унинг ташкилот ходимларидан бири эканини тасдиқлаган. Ташкилот қоидаларига кўра, Эбола билан касалланган беморлар билан ишлаган гуманитар ходимлар одатда уч ҳафталик карантиндан ўтади.

Сўнгги расмий маълумотларга кўра, Конго Демократик Республикасида 15 май куни бошланган Эбола эпидемияси давомида ҳозирга қадар 1 561 нафар кишида вирус тасдиқланган, улардан 506 нафари вафот этган.

Эслатиб ўтамиз, аввалроқ Конго Демократик Республикасида Бундибугё штамми келтириб чиқарган Эбола вирусига қарши даволаш усулини синовдан ўтказиш бошланганди.