Франция “свет”сиз қолди

Бугун, 24 май куни эрталаб Франциянинг жанубида содир бўлган катта электр таъминотининг узилиши оқибатида 160 мингга яқин уй электрсиз қолди. Бу ҳақда “Le Monde” хабар берди.

Маълум қилинишича, ҳолат айни пайтда Канн шаҳрида ўтаётган 78-Канн халқаро кинофестивалига ҳам таъсир кўрсатган.

Электр узилиши маҳаллий вақт билан соат 10:00 атрофида бошланган. Франциянинг электр тармоғи оператори таъмирлаш ишлари тезлик билан олиб борилаётганини билдирган.

Расмийларга кўра, узилишга атайлаб чиқарилган ёнғин сабаб бўлиши мумкинлиги текширилмоқда. Ҳеч ким ҳибсга олинмаган, тергов давом этмоқда.

Кинофестиваль ташкилотчиларига кўра, асосий тадбирлар ўтказиладиган Palais des Festivals саройи мустақил электр манбаига ўтган. Бу эса режадаги барча тадбирлар, жумладан, ёпилиш маросимини ўз вақтида ўтказиш имконини берган.

BFMTV телеканалига кўра, эрталабки икки намойиш беш дақиқа тўхтаб қолган, бироқ кейин яна давом эттирилган. Фестиваль ташкилотчилари ёпилиш маросими одатдагидек ўтишига ишонч билдирган. Айнан шу тадбирда энг яхши фильмлар мукофотланиши кўзда тутилган.

Эслатиб ўтамиз, жорий йилнинг 28 апрель куни эрталаб Пиреней яримороли бўйлаб электр таъминотида узилишлар юз берганди. 

Узилиш Испания, Португалия ва камроқ даражада Франция, Бельгия ва Андоррага таъсир кўрсатди. Электр токининг ўчирилиши жамоат транспорти, аэропортлар, банклар ва дўконлар ҳамда мобил алоқада узилишларга олиб келди.