Франция почтаси кенг кўламли киберҳужумга учради

Франциянинг миллий почта оператори La Poste Рождество байрами арафасида йирик киберҳужумга учради. Бу ҳақда “Euronews” хабар берди.

Қайд этилишича, кеча 22 декабрдан бошлаб компаниянинг расмий сайти ишламай қолган, жўнатмаларни элтиш ва етказиб бериш жиддий қийинлашган, уларни онлайн кузатиш имконияти йўқолган. Франция бўйлаб почта бўлимларида ходимлар норози бўлган мижозларни тинчлантиришга мажбур бўлмоқда.

Шунингдек, почта операторининг банк бўлинмаси мижозлари ҳам мобил иловалар орқали ўз ҳисобларига кира олмаётганини билдирган. Расмийлар фуқароларни шахсий маълумотлар хавфсиз эканига ишонтирган. Вақтинчалик чоралар сифатида тўловларни тасдиқлаш SMS-хабар орқали амалга оширилиши мумкинлиги айтилган.

Нашрнинг ёзишича, сервислар билан боғлиқ муаммолар аслида 20 декабрдан бошлаб кузатилган, бироқ миллий оператор бу носозликлар ҳам хакерлар ҳужуми билан боғлиқ бўлган-бўлмаганини аниқ айта олмаяпти. Ҳозирча ҳеч бир гуруҳ ушбу ҳужум учун жавобгарликни ўз зиммасига олмаган.

Қайд этилишича, почта тизимига қилинган ҳужумдан олдин Франция Ички ишлар вазирлиги ҳам хакерлар нишонига айланган. Ўзини ҳужум учун масъул деб эълон қилган хакер 16,4 миллион нафар Франция фуқаросига оид маълумотларга эга бўлганини иддао қилган. Бироқ вазирлик бу маълумотни рад этиб, хакер фақат бир неча ўнлаб ҳужжатларни қўлга киритганини, улар орасида қидирувга оид маълумотлар ва айрим баённомалар бўлганини маълум қилган. 

Эслатиб ўтамиз, аввалроқ Россия махсус хизматлари дунёдаги энг йирик контейнер ташиш компаниясига тегишли бўлган кемага киберҳужум уюштиргани ҳақида хабар берилган эди. Ушбу ҳужум Франциянинг жанубидаги Сет портидан паром жўнаб кетишини бир кунга кечиктирган.