Фожиадан сабоқ: ёнғин пайтида нималар қилиш керак?

Ёнғин – энг тез тарқаладиган ва энг аёвсиз фалокатлардан бири. У сониялар ичида нафақат моддий бойликларни, балки инсон ҳаётини ҳам олиб кетиши мумкин. Сўнгги пайтларда кузатилаётган ёнғин фожиалари шуни кўрсатмоқдаки, кўплаб ҳолатларда унинг асосий сабаби бепарволик ва хавфсизлик қоидаларига амал қилинмаслигидир.

Бундай фожиаларда энг аввало, инсон ҳаёти хавф остида қолади. Тутундан заҳарланиш, куйиш, ваҳима сабаб юзага келадиган тиқилинч ҳолатларда болалар ва кексалар олов ичида қолиб кетиши мумкин. 

Мутахассислар фикрича, ёнғинларнинг аксарият қисмини олдини олиш мумкин. Бунинг учун энг аввало ёнғин хавфсизлиги қоидаларига қатъий риоя этиш талаб этилади.

Электр тармоқлари, розеткалар ва иситиш мосламаларидан фойдаланишда меъёрларга амал қилиш муҳим. Ортиқча юклама, сифатсиз жиҳозлар ва вақтида таъмирланмаган симлар ёнғиннинг асосий сабабларидан биридир. Айниқса, болалар майдончалари ва кўнгилочар масканларда бу масалага икки карра эътибор қаратилиши лозим.

Шунингдек, аҳолининг ёнғин пайтида қандай ҳаракат қилиш бўйича билим ва кўникмаларини ошириш ҳам муҳим. Фавқулодда вазиятларда саросимага тушмаслик, энг яқин чиқиш йўлини билиш ва бошқаларга ёрдам бериш кўплаб ҳаётларни сақлаб қолиши мумкин.

Ёнғин кутилмаганда юз беради, аммо унинг олдини олиш ҳар биримизнинг қўлимизда. Бир лаҳзалик бепарволик ортидан катта фожиа келиб чиқмаслиги учун масъулиятни ҳис қилишимиз зарур. Ҳар бир қоидага амал қилиш бу ўзимиз ва яқинларимизни  асраш демакдир.

Видео тафсилотлари билан батафсил танишиш учун QALAMPIR.UZ’нинг YouTube’даги саҳифаси орқали ушбу репортажни томоша қилинг.