FIFA ва UEFA Исроил жиноятларига шерикликда айбланмоқда

Халқаро жиноий судга (ХЖС) FIFA ва UEFA’га қарши шикоят йўлланди. Мурожаат бир неча ҳуқуқни муҳофаза қилувчи ташкилотлар, жумладан, Женевада жойлашган Европа-Ўрта ер денгизи инсон ҳуқуқларини кузатиш ташкилоти томонидан тақдим этилган. Бу ҳақда “Анадолу” хабар берди.

Даъво аризасида FIFA президенти Жанни Инфантино ва UEFA президенти Александер Чеферин “босиб олинган Фаластин ҳудудидаги ҳарбий жиноятлар” ва “инсониятга қарши жиноятларга кўмаклашиш”да айбланмоқда. Шикоятга босиб олинган ҳудудлардаги ноқонуний аҳоли пунктларида жойлашган Исроил клубларининг халқаро мусобақаларда иштирок этаётгани сабаб бўлган.
 
“Анадолу” агентлиги мухбири вазиятни Нью-Брансуик университети ўқитувчиси ва “Фаластин учун Ирландия спорти” ташкилоти аъзоси Натан Кальман-Ламб билан муҳокама қилган.

“UEFA ва FIFA ушбу клубларнинг босиб олинган ҳудудларда мавжудлиги қонунийлигини тан олмоқда, шунингдек, Исроил футбол федерацияси ва унинг барча жамоаларига йирик спорт тадбирларида қатнашишга рухсат бермоқда”, дейди у.

Кальман-Ламб Ғазо секторидаги геноцид фонида ХЖСга қилинган мурожаат “ўта муҳим” аҳамиятга эга эканини айтган.

“Ғазодаги бизга маълум бўлган геноциддан ташқари, яна бир омил борки, биз уни “спортчиларга қарши геноцид” деб атаймиз. Ғазо спорт ҳамжамиятининг қарийб 1000 нафари ўлдирилди, эксклавдаги юзлаб спорт иншоотлари вайрон қилинди. Бу ҳаракатларни Исроилнинг Ғазода амалга ошираётган ишлари доирасида спорт ҳамжамиятига нисбатан оғир жиноятлар деб қараш мумкин”, дея тушунтирган эксперт.

Мутахассиснинг таъкидлашича, босиб олинган ҳудудларда Исроил клублари ва спорт инфратузилмасининг мавжудлиги аҳоли пунктларини мустаҳкамлаш сиёсатининг бир қисми бўлиб, бу халқаро ҳуқуқни бузади. Шунингдек, у FIFA ва UEFA четлатиш ҳақидаги чақириқларга қарамай, Исроил клублари ва терма жамоаларини халқаро турнирларга қўйишда давом этаётганини кўрсатиб ўтган. Унинг фикрича, шу йўл билан ташкилотлар босиб олинган ҳудудлардаги жамоаларнинг қонунийлигини тан олмоқда. 

Кальман-Ламбнинг қўшимча қилишича, Фаластин футбол ассоциацияси ўз юрисдикциясини талаб қилмоқда ва бундай ҳаракатлар FIFA ҳамда UEFA низомларига зид деб ҳисоблайди.