FIFA рейтинги янгиланди. Ўзбекистон нечанчи ўринда?

Бугун, 11 июнь куни FIFA Жаҳон чемпионати олдидан ўтказилган ўртоқлик учрашувларидан сўнг, миллий жамоаларнинг янгиланган рейтингини эълон қилди. Унга кўра, Ўзбекистон миллий терма жамоаси 50-поғонадан ўрин олди. 

Шунингдек, Ўзбекистон МТЖ Осиё жамоалари орасида 5-ўринни банд этди. Ундан юқорида эса Япония (18), Эрон (20), Жанубий Корея (25), Австралия (27) терма жамоалари жой олган.

Ўзбекистон миллий терма жамоаси жорий йилнинг 2 июнь куни Канадага ва 8 июнь куни Нидерландияга мағлубиятга учради. Оқибатда “оқ бўрилар” FIFA рейтингида 6,47 балл йўқотди, бироқ бошқа жамоаларнинг ҳам очко йўқотиши оқибатида Ўзбекистон 50-поғонадаги ўрнини сақлаб қолди.

Шу тариқа, Ўзбекистон терма жамоаси икки ўртоқлик учрашувидан сўнг, жами 6,47 очкони йўқотиб, 1458,73 балл тўплаган ҳолда мундиалга тайёргарликни давом эттирмоқда.

Ҳозирги FIFA рейтингида амалдаги жаҳон чемпиони Аргентина терма жамоаси пешқадамлик қилмоқда. Ундан кейинги ўринни Европа чемпиони Испания эгаллаган бўлса, Дидье Дешам бошчилигидаги Франция терма жамоаси кучли учликни якунлаб турибди.