FIFA Месси билан боғлиқ баҳсли вазият юзасидан изоҳ берди

FIFA ҳакамлар қўмитаси раиси Пьерлуижи Коллина Аргентина терма жамоаси сардори Лионель Месси иштирок этган баҳсли вазият юзасидан изоҳ берди. Бу ҳақда Коллина “The Sun” нашрига берган интервьюсида айтиб ўтди.

“FIFA қоидаларига кўра, мазкур эпизодни жиддий қоидабузарлик ёки тажовузкор ҳаракат сифатида баҳолаб бўлмайди. Бутса билан рақиб оёғи ўртасидаги тегиниш ортиқча куч ишлатиш ёки қасддан қилинган ҳаракат оқибатида юз бермаган. Бу ўйиннинг табиий жараёнида содир бўлган ҳолат бўлиб, рақиб футболчиси учун жиддий хавф туғдирмаган”, дейди Коллина.

Мазкур ҳолат 2026 йилги Жаҳон чемпионати гуруҳ босқичининг биринчи туридаги Аргентина – Жазоир учрашувининг 31-дақиқасида содир бўлган. Воқеа давомида Месси тўп учун кураш жараёнида жазоирлик ҳимоячи Айсса Мандининг оёғини босиб кетган.

Эпизоддан кейин айрим мутахассислар ва мухлислар аргентиналик футболчи жазоланиши кераклигини таъкидлаган. Бироқ бош ҳакам Шимон Марчиняк унга карточка кўрсатмади, VAR тизими ҳам вазиятни қўшимча кўриб чиқишни тавсия қилмади.

Бу қарор футбол жамоатчилиги орасида қизғин муҳокамаларга сабаб бўлган бўлса-да, FIFA майдондаги ҳакамлар қарорини қўллаб-қувватлади.

Эслатиб ўтамиз, Лионель Месси Жаҳон чемпионатида Жазоирга қарши баҳсда хет-трик қайд этиб, Аргентина терма жамоасининг 3:0 ҳисобидаги ғалабасига ҳисса қўшган. Шунингдек, у Жаҳон чемпионатлари тарихидаги энг яхши тўпурарлар рўйхатида Германия терма жамоасининг собиқ ҳужумчиси Мирослав Клозенинг натижасига тенглашган.