FIFA Фаластиннинг шикояти билан Исроилни жазолади

Халқаро футбол федерацияси (FIFA) ўз расмий сайтида Исроил футбол ассоциациясига (ИФА) нисбатан санкциялар жорий этилганини эълон қилди.

Ташкилот Фаластин футбол ассоциациясининг (ПФА) шикоятларини кўриб чиққан ва тахмин қилинаётган қоидабузарликлар бўйича текширув ўтказган. Натижада FIFA Тартиб-интизом кодексининг иккита моддаси бузилганини қайд этган:

ҳақоратли хулқ-атвор ва ҳалол ўйин (fair play) тамойилларини бузиш;
камситиш ва ирқчилик руҳидаги ҳақоратлар.

ИФАга 150 минг швейцария франки миқдорида жарима солинган. Ушбу маблағнинг учдан бир қисми камситишга қарши кураш чораларини амалга оширишга йўналтирилиши керак. FIFA ИФАга келгусидаги қоидабузарликларнинг олдини олиш режасини ишлаб чиқишни буюрган. Исроил томонига кейинги учта уй учрашувида "Футбол дунёни бирлаштиради — камситишга йўқ деймиз" деган ёзувли "яхши кўринадиган" баннерни жойлаштириш бўйича кўрсатма берилган.

Шунингдек, FIFA ПФАнинг "тахминан Фаластин ҳудудида жойлашган" Исроил жамоаларининг чиқишлари бўйича қилган мурожаати юзасидан ҳам баёнот берди. Гап Иордан дарёсининг Ғарбий соҳили ҳақида бормоқда, унинг бир қисми Исроил назоратида.

“FIFA Уставининг тегишли қоидаларини талқин қилиш контекстида, Ғарбий Соҳилнинг якуний ҳуқуқий мақоми халқаро оммавий ҳуқуқ доирасида ҳал қилинмаган ва ўта мураккаб масала бўлиб қолаётганини ҳисобга олиб, FIFA ҳеч қандай чора кўрмаслиги керак. FIFA Фаластин ва Исроил футбол ассоциациялари ўртасидаги мулоқотга кўмаклашишда ва оператив даражада воситачи сифатида иштирок этишда давом этиши лозим. Ушбу контекстда FIFA келгусида ҳам тизимли ҳамкорликни қўллаб-қувватлайди ва воқеалар ривожини кузатиб боради”, дейилади баёнотда.

FIFA президенти Жанни Инфантино шундай қўшимча қилган: 

“Биз геосиёсий можароларни ҳал қила олмаймиз, лекин алоқаларни ўрнатиш ва тинчликка кўмаклашиш учун футбол кучидан фойдаланишга қатъий қарор қилганмиз, чунки ҳозир хаёлимиз давом этаётган урушлар оқибатларидан азият чекаётганлар билан”.