Файзуллаевга Топ-5 лига клуби қизиқиш билдирди

Ўзбекистон миллий терма жамоаси ва Туркиянинг “Истанбул Башакшеҳир” клуби ярим ҳимоячиси Аббосбек Файзуллаев Франциянинг “Страсбург” клуби эътиборини тортди. Бу ҳақда “Les-transferts” нашри хабар берди.

Манбага кўра, Лига 1 вакили 22 ёшли футболчининг вакиллари билан боғланиб, дастлабки музокараларни бошлаган. Ҳозирча томонлар ўртасида расмий таклиф ёки келишув мавжуд эмас.

Файзуллаев 2025 йилнинг ёзида Москванинг ЦСКА клубидан “Истанбул Башакшеҳир”га кўчиб ўтган. Унинг Туркия клуби билан шартномаси 2030 йил июнь ойигача амал қилади. “Transfermarkt” футболчининг бозор қийматини 7 миллион еврога баҳоламоқда.

Маълумот учун, Аббосбек Файзуллаев Ўзбекистоннинг миллий терма жамоаси сафида 35 та учрашувда майдонга тушиб, 9 та гол урган. 2026 йилги Жаҳон чемпионатида у Ўзбекистон терма жамоасининг турнир тарихидаги илк голини урди. Футболчи Колумбияга қарши учрашувда ягона голига муаллифлик қилди, бироқ Ўзбекистон якунда 1:3 ҳисобида мағлуб бўлганди.