Falastinliklar qurbonlarni qayta dafn etmoqda

Falastinning G‘azo shahridagi “Ash-Shifa” shifoxonasi hovlisida ommaviy qabristonni ochish ishlari bo‘lib o‘tmoqda. Qutqaruv xizmatlari va ko‘ngillilar 180 jasaddan 48 tasini qazib olgan. Bu haqda “Arab News” nashri xabar berdi.

Ma’lumotlarga ko‘ra, Isroil tomonidan amalga oshirilgan bombardimon va artilleriya zarbalari oqibatida shifoxona hovlisi vayronalar, qoldiqlar va chiqindilar bilan qoplangan. Mahalliy aholi oddiy belkurak va qo‘llari bilan vayronalarni tozalab, qurbon bo‘lganlar jasadlarini qazib olmoqda va ularni diniy marosimlarga muvofiq dafn etish uchun shay qilmoqda.

Xabarga ko‘ra, topilgan 48 jasaddan 38 tasi allaqachon aniqlangan va dafn etish uchun olib ketilgan, yana 10 jasad shaxsini aniqlash jarayonida. Fuqaro mudofaasi boshqarmasining hisob-kitoblariga ko‘ra, 2023 yil oktyabr oyida Falastin-Isroil mojarosi keskinlashganidan buyon “Ash-Shifa” shifoxonasi hovlisida 180 ga yaqin odam dafn etilgan.

AFP tomonidan olingan tasvirlarda qutqaruvchilar hovlining ayrim joylarini kovlayotgani va inson qoldiqlari bo‘lgan oq xaltalarni chiqarayotgani, so‘ng ularni adyollarga o‘rab olib ketayotgani aks etgan.

G‘azo shahri fuqarosi Muhammad Abu Asiy shifoxonaga kelib, akasining jasadini aniqlaganini aytdi.

“Bu urushni yana boshdan kechirgandek bo‘ldim. Akamning jasadini topish uni bugun dafn qilgandek his qildirdi – og‘riq va yaralar yana ochildi”, deydi u.

Yana bir g‘azolik fuqaro Suha al-Sharif o‘g‘lining jasadini topish umidida shu yerga kelganini aytdi.

“O‘g‘lim qanday kiyim kiyganini bilaman. Shuning uchun keldim. Xudo xohlasa, uni topaman”, deydi u.

Ma’lumot uchun, G‘azodagi shifoxonalar, xususan Ash-Shifa 2023 yil 7 oktyabrdan beri Isroil kuchlari tomonidan qayta-qayta nishonga olingan.

Eslatib o‘tamiz, avvalroq Isroil kuchlarining G‘azo sektoriga hujumi oqibatida bir kun ichida sakkiz kishi halok bo‘lgandi. Ma’lum qilinishicha, ikki o‘rtada sulh bitimining ikkinchi bosqichi imzolanishi kutilayotgan bir paytda, Isroilning G‘azo sektoriga qaratilgan hujumlari oqibatida 8 kishi halok bo‘lgan.