Эззалзули Сеутани қўллаб-қувватлагани учун ўлим таҳдидларига учради

Марокашлик футболчи Абде Эззалзули Африканинг шимолида жойлашган Испания анклави Сеута билан бирдамлик билдирган “Бетис” клубига қўшилгани ортидан ўлим таҳдидларига учради. Бу ҳақда  “A Bola” нашри хабар берди.

“Реал Бетис”нинг “Вильярреал”га қарши сафардаги учрашуви олдидан Абде икки жамоа футболчилари билан биргаликда Сеута аҳолисини қўллаб-қувватлаш мақсадида “Todos somos ceutes” (“Биз ҳаммамиз Сеуталикмиз”) шиори туширилган футболка кийди.

Бироқ футболчининг ушбу ҳаракати айрим марокашлик ижтимоий тармоқ фойдаланувчиларининг ғазабига сабаб бўлди. “A Bola” нашри хабар беришича, Абде ижтимоий тармоқларда ватандошларидан ҳақорат ва таҳдидлар олган. Айрим фойдаланувчилар уни “хоин” ва “қўрқоқ” деб атаган.

“Ҳақиқий марокашлик ўз ватани энг кўп муҳтож бўлган пайтда уни ташлаб кетмайди. Айрим нарсалар ҳеч қачон унутилмайди ва хиёнат йиллар давомида қозонилган ҳурматни йўқ қилади”,  деб ёзган фойдаланувчилардан бири.

Яна бир изоҳда эса: “Ватанга хиёнат бир лаҳзалик ҳаракат эмас, балки тарихий хотирада қоладиган шармандаликдир. Ватанни сотиб бўлмайди ва ўз юртига хиёнат қилганлар унинг ўзини йўқотишидан олдинёқ ҳурматни йўқотади”,  дея таъкидланган.

Маълумот учун, Абде Марокашнинг Бени-Меллал шаҳрида туғилган ва Испаниянинг Эльче шаҳрида вояга етган. 2021 йилда у Испания терма жамоаси сафида ўйнаш имкониятини кўриб чиққан, аммо якунда Марокаш миллий жамоасини танлаган.