“Эвертон” футболчиси ўз жамоадошига қўл кўтаргани учун майдондан четлатилди (видео)

Кеча, 24 ноябрь куни Англия Премьер-лигасида 12-тур доирасидаги “Манчестер Юнайтед” ва “Эвертон” баҳсида меҳмонлар ярим ҳимоячиси Идрисса Гейе жамоадоши Майкл Кинни уриб юборгани учун майдондан четлатилди.

Воқеа биринчи бўлим бошида, учрашувнинг 13-дақиқасида “Эвертон” жарима майдончаси ичида содир бўлди. Гейе Кинга нотўғри узатма бериб қўйганидан сўнг улар ўртасида тортишув юзага келди ва сенегаллик футболчи жамоадоши юзига тарсаки туширди. Ҳакам Тони Харрингтон ҳолатни дарҳол баҳолаб, Гейега тўғридан тўғри қизил карточка кўрсатди. VAR қарорни тасдиқлади.

Гейе четлатилгач, “Эвертон” 10 футболчи билан ўйнашига қарамай, қисқа фурсатдан сўнг 29-дақиқада Кирнан Дьюзбери-Холлнинг голи билан ҳисобни очди. Якунда “Эвертон” шу ҳисобни сақлаб қолди ва “Олд Траффорд”дан 3 очко билан қайтишга эришди.

Ўйиндан сўнг “Эвертон” бош мураббий Дэвид Мойес воқеани изоҳлаб, футболчи хатосини тан олганини айтди:

“Уларнинг бир-бирлари билан тортишганидан бироз ҳафсалам пир бўлди, аммо бу уларнинг ўйинга бўлган муносабатини кўрсатади. Гейе кийиниш хонасида узр сўради. Масала ёпилди”,  деди у.

Бу Премьер-лигада жамоадошлар ўртасидаги можаро туфайли берилган камдан-кам қизил карточкалардан биридир. Сўнгги марта шунга ўхшаш ҳолат 2008 йилда “Сток Сити” футболчиси Рикардо Фуллер билан содир этган эди. 2005 йилда эса Ли Бойер ва Кирон Дайер “Ньюкасл” таркибида майдонда ўзаро жанжаллашгани учун қизил карточка олган.