Этна яна “уйғонди”: Сицилияда парвозлар тўхтатилди (фото)

Италиянинг Сицилия оролидаги Этна вулқонидан отилган янги кул ҳавога тарқалиши ортидан Катания аэропортида парвозлар тўхтатилди. Бу ҳақда “Reuters” хабар берди.

Маълум қилинишича, кеча, 12 август куни Этна вулқонидан кул отилиши Шарқий Сицилия ҳаво ҳудудида ҳаракатланишга чекловлар жорий этилишига сабаб бўлган. Шу боис Катания аэропортидаги парвозлар тўхтатилган.

Вулқон кулининг таъсири Сицилия билан чекланиб қолмаган. Кул Жанубий Италия томондан Ўрта ер денгизи бўйлаб жанубга тарқалиши оқибатида қўшни Мальтада ҳам айрим рейслар бекор қилинган ва сезиларли кечикишлар кузатилган.

Этна вулқони Европадаги энг баланд ва энг фаол вулқонлардан бири ҳисобланади. Унинг фаоллашиши Сицилиянинг асосий ҳаво дарвозаси бўлган Катания аэропорти ишига тез-тез таъсир кўрсатади. Катания аэропорти йўловчилар оқими бўйича Италиядаги бешинчи энг гавжум аэропорт ҳисобланади.

Вулқон фаоллиги ва шамол йўналишининг ўзгариши сабабли Шарқий Сицилияда авиақатновлар билан боғлиқ муаммолар ўтган ҳафтадан бери давом этмоқда.

Шунингдек, Катания аэропортидаги чекловлар Сицилиянинг бошқа аэропортларига ҳам қўшимча юклама туширган. Палермо мэри Роберто Лагалла сўнгги кунларда шаҳар аэропорти Катанияга режалаштирилган 190 та рейсни қабул қилгани ёки уларни амалга оширишга хизмат қилганини маълум қилган.

Катаниядан бошқа аэропортларга йўналтирилган айрим йўловчилар эса автобус ва таксиларга талаб кескин ошгани сабаб транспорт масаласида етарли ёрдам кўрсатилмаганидан шикоят қилган.

Эслатиб ўтамиз, аввалроқ Индонезиядаги Дукoно вулқони отилиши оқибатида уч сайёҳ ҳалок бўлгани ҳақида хабар берилган эди.