Эронга қарши уруш Европани “фалаж” қилиши мумкин – ОАВ

АҚШ ва Исроилнинг Эронга қарши уруши туфайли юзага келган энергетика инқирози Европа иқтисодиётига оғир зарба бериши мумкин. Бу ҳақда “The Wall Street Journal” хабар берди. 

Нашр прогнозига кўра, бу ҳолат узоқ давом этган иқтисодий турғунликдан сўнг ўсишни тезлаштиришни режалаштирган Европа учун “кутилмаган ҳолат” бўлиши мумкин.
Нефть ва газ нархининг ошиши аллақачон Европа давлатларининг қазилма ёқилғи импортига сарфини оширган. Можаронинг дастлабки ўн кунида бу харажатлар қарийб 3 миллиард еврога кўпайган.

Европа Иттифоқи ҳукуматлари вазият оқибатларини юмшатишга ҳаракат қилмоқда, бироқ уларнинг имкониятлари Украинадаги уруш бошланган пайтдагидан ҳам чекланган. Сўнгги йилларда Европада давлат қарзи ва қарз олиш қиймати сезиларли даражада ошган. Буюк Британия ва Францияда давлат қарзи камида сўнгги 60 йил ичидаги энг юқори даражага яқинлашган ёки шу даражага етган.

Энергия нархининг ошиши саноатга босимни кучайтирмоқда. Кимё саноати ва ўғит ишлаб чиқариш каби энергияга кучли боғлиқ тармоқлар газ нархи ошиши ва инфляция хавфи ҳақида огоҳлантирмоқда. Бу ҳолат айрим заводларнинг ёпилиши ва ишлаб чиқаришнинг Хитой ёки АҚШга кўчирилиши хавфини ҳам келтириб чиқармоқда.

Нашрнинг ёзишича, Эрон атрофидаги можаро АҚШ Президенти Дональд Трамп сиёсати туфайли Европа иқтисодиётига берилган навбатдаги зарба бўлган. Ўтган йили жорий этилган тарифлар Европа компанияларининг энг йирик экспорт бозорларидан бирига киришини чеклаган ҳамда АҚШ бозорига қўйилган тариф тўсиқлари сабаб Хитойдан импортнинг Европага кўпайишига олиб келган.

Эслтиб ўтамиз, аввалроқ Исроил Бош вазири Биньямин Нетаньяхунинг Эрон атрофидаги вазият бўйича олиб бораётган сиёсати Исроил ва АҚШ ўртасидаги муносабатларнинг ёмонлашишига олиб келиши мумкинлиги ҳақида хабар берилганди.