Эрондаги уруш сабаб олтин нархи кескин кўтарилди

АҚШ ва Исроилнинг Эронга берган зарбаларидан сўнг биржада олтин нархи кескин ошди. Бугун, 2 март кунги савдоларда Чикаго товар биржасида (CME) апрель ойидаги олтин фьючерслари нархи 2,88 фоизга кўтарилиб, бир унция учун 5399 долларни ташкил этди. Бу ҳақда “Reuters” хабар берди.

Нашрнинг ёзишича, авваллари эҳтимоли паст деб ҳисобланган Яқин Шарқдаги можаро эндиликда инвесторлар учун асосий муаммога айланган. Улар минтақавий урушнинг чўзилиб кетиши жаҳон савдосидан тортиб инфляциягача бўлган барча соҳаларга таъсир қилишидан хавотирда.

KCM Trade бош бозор таҳлилчиси Тим Уотеррнинг фикрича, олтинга бўлган талаб “хавфсиз актив” сифатида янада ошади. Бунга инфляциядан қўрқиш, можаронинг давомийлиги ва унга бошқа давлатларнинг аралашиш хавфи сабаб бўлмоқда.

“Фонд бозорлари ва бошқа хавфли активлар катта эҳтимол билан сотувга чиқарилади (пасаяди). Инвесторлар ўз маблағларини қаерга йўналтиришни қидирадилар ва бу рўйхатда олтин биринчи ўринда туради”, дейди у.

Таҳлилчиларнинг олтин бозори бўйича прогнозлари

City Index ва Forex.com бозор таҳлилчиси Фавад Разакзода олтин нархи бир унция учун 5500 долларгача, эҳтимол январь ойидаги рекорд – 5600 доллардан ҳам юқорироққа кўтарилишини истисно этмаяпти. Бироқ экспертнинг фикрича, АҚШ доллари курсининг қайта тикланиши олтин нархининг бундан юқорига ўсишини чеклаб қўйиши мумкин. 

Эслатиб ўтамиз, аввалроқ АҚШ ва Исроил жорий йилнинг 28 февраль куни Эронга қарши ҳарбий операция бошланганини эълон қилди ва мамлакат бўйлаб кўплаб зарбалар берилди. АҚШ Президенти Дональд Трамп операция бошланишини Вашингтоннинг ядровий келишув бўйича музокараларда “сабри тугагани” билан изоҳлади.

Бунга жавобан Эрон Форс кўрфази мамлакатларидаги Америка базаларига қаратилган ҳаво ҳужумлари тўлқинини бошлади. Форс кўрфазидан нефть етказиб бериш тўхтаб қолган. Ҳарбий операция давомида Эрон Олий раҳбари Али Хоманаий ўлдирилди. 1 март оқшомида Дональд Трамп Эроннинг янги раҳбарияти АҚШга музокаралар бошлашни таклиф қилганини маълум қилди.