Эронда “Оскар”га номзод бўлган фильм ижодкори ҳибсга олинди

“Оддий тасодиф” фильми сценарийси учун 2025 йилги “Оскар” мукофотига номзод бўлган эронлик ижодкор Меҳди Маҳмудиан ҳукуматнинг намойишчиларга қарши кескин чораларини қоралагани сабабли ҳибсга олинди. Бу ҳақда “The New York Times” хабар берди.

Нашрнинг ёзишича, “Оскар” мукофотига номзод бўлган сценарий муаллифи ҳукуматнинг намойишчиларга нисбатан шафқатсизларча бостиришларини қораловчи баёнотни имзолаганидан сўнг қўлга олинган.

АҚШда жойлашган Инсон ҳуқуқлари фаоллари ахборот агентлиги маълумотига кўра, Маҳмудян баёнотни имзолаган бир нечта шахслардан бири ҳисобланади. Ушбу баёнотда жами 17 нафар шахс – таниқли адвокатлар, санъаткорлар ва фуқаролик фаоллари имзо чеккан.

Маҳмудян ва бошқа имзоловчиларнинг айни пайтда қаерда экани ҳақида аниқ маълумот йўқ. Шунингдек, уларга нисбатан қўзғатилган ишларнинг тафсилотлари ҳам ошкор қилинмаган.

Эслатиб ўтамиз, 2025 йил декабрь ойининг охирида Эрон миллий валютаси риалнинг кескин қадрсизланиши мамлакатда оммавий норозилик намойишларига сабаб бўлди. Ҳукумат бунга жавобан хавфсизлик чораларини кучайтириб, полиция намойишчиларга қарши кўздан ёш оқизувчи газ ва бошқа ўлдирмайдиган куч воситаларидан фойдаланди. Намойишлар оқибатида минглаб одамлар ҳалок бўлган.