Эронда ҳаводаги самолётнинг шиналаридан бири ёрилиб кетди (видео)

Эронда Sepehran Airlines авиакомпаниясининг Boeing 737 русумли самолёти ҳавога кўтарилганидан кўп ўтмай унинг шиналаридан бири ёрилиб кетди. Бу ҳақда “Fararu” агентлиги хабар берди.

Қайд этилишича, воқеа кеча, 15 сентябрь куни соат 17:39 атрофида содир бўлган. Ижтимоий тармоқларда тарқалган видеоларда самолёт кучли тебранаётгани, салон шифт қопламасининг айрим қисмлари ажралиб тушгани ва юк жавонларидаги буюмлар сочилиб кетгани акс этган.

Маълум қилинишича, учоқ Машҳаддан Кирмоншоҳга парвоз қилаётган бўлган. Дастлабки маълумотларга кўра, ҳавога кўтарилиш вақтида самолётнинг шиналаридан бири ёрилган. Кейинчалик двигателлардан бирида ҳам носозлик юзага келгани ҳақида хабарлар тарқалган.

Шундан сўнг учувчи фавқулодда ҳолат эълон қилиб, учоқни жўнаб кетган аэропортга қайтаришни сўраган.

Самолёт Машҳад халқаро аэропортига муваффақиятли қўнган. Ҳодиса вақтида йўловчилар ва экипаж аъзолари жабрланмаган.

Ижтимоий тармоқларда самолёт салонидан олинган видеолар ҳам тарқалган. Кадрларда фюзеляж ички қопламасининг айрим қисмлари ажралиб тушгани, юк жавонларидаги буюмлар сочилиб кетгани ва йўловчиларнинг ваҳимага тушгани акс этган.

Ҳодисадан сўнг аэропортнинг 31-рақамли чап учиш-қўниш йўлаги вақтинча ёпилган.

Маълумотларга кўра, йўловчилар самолётдан хавфсиз туширилган ва уларни Кирмоншоҳга етказиш учун бошқа рейс ташкил этилган. Ҳозирча салон шифт қопламасининг ажралиб тушишига нима сабаб бўлгани ва самолётни фавқулодда қўндиришга олиб келган носозликнинг аниқ сабаби маълум қилинмаган.

Бу Sepehran Airlines авиакомпаниясининг Машҳаддаги сўнгги вақтдаги иккинчи ҳодисаси бўлиб, 25 август куни компаниянинг Boeing 737-500 русумли самолёти Теҳрондан Машҳадга қўнганидан сўнг учиш-қўниш йўлагидан чиқиб кетган ва олд шассиси қулаган. У самолётда 127 киши бўлган, бироқ ўшанда ҳам жабрланганлар ҳақида хабар берилмаган.

Эслатиб ўтамиз, аввалроқ Греция шарқида авиашоу вақтида F-4 Phantom қирувчи самолёти ҳалокатга учрагани ҳақида хабар берилган эди.