Эронда ҳам самолёт қулади (видео)

Эроннинг Гилан вилояти Рашт шаҳри яқинида ўқув самолёти ҳалокатга учради ва бортда бўлган уч экипаж аъзоси ҳалок бўлди. Бу ҳақда вилоят полициясига таяниб, “Tasnim” хабар берди.

Гилан вилояти полицияси бошлиғининг сўзларига кўра, бу енгил ўқув самолёт бўлган. У Канарсар қишлоғидаги Кучсафхон секторида ҳалокатга учраган ва бу самолётнинг қулашига техник носозлик сабаб бўлган. 

Қайд этилишича, ушбу ўқув самолёти Эрон пойтахти Теҳронда жойлашган Меҳробод аэропортидан Гилан вилоятига қараб йўл олган. У маҳаллий вақт билан соат 10:10 да ҳалокатга учраган ва бу самолётнинг уч нафар экипаж аъзоси ҳалок бўлган.

“Бугун эрталаб соат 10:25 атрофида Гилан Қизил Ярим Ярим Ой Жамияти операция назорати марказига Кучсафхон ҳудудида самолёт қулагани ҳақидаги хабар хабар қилинди”, деган Гилан Қизил Ярим Ой Жамияти Бош директори Ҳади Салимий.

Унинг сўзларига кўра, жамиятнинг тезкор кучлари зудлик билан воқеа жойига тўртта тез ёрдам машинаси ва қутқарув тўпламлари жўнатган.

Охирги кунларда ҳалокатга учраган самолётлар

29 декабрь куни Жанубий Кореядаги аэропортда бортида 181 киши бўлган самолёт ҳалокатга учраганди. Самолёт мамлакат жануби-ғарбидаги Муан халқаро аэропортида учиш-қўниш йўлагидан чиқиб кетган ва қўниш йўлаги ташқарисидаги тўсиққа урилиб, ёниб кетган.

Хабар қилинишича, ичида 175 йўловчи ва олти нафар борт ходими бўлган Jeju Air самолёти Таиланднинг Бангкок шаҳридан қайтаётган ва қўнаётган вақтда аварияга учраган. Йўловчиларнинг 173 нафари Жанубий Корея фуқароси ва икки нафари Таиланд фуқароси бўлган. Ҳалокатга учраган Boeing бир кун олдин ҳам бортдаги фавқулодда вазият тўғрисида хабар берган. Ўшанда ҳаво кемаси парвозни давом эттиришдан олдин мажбурий қўнишни амалга оширган. Сўнгги маълумотларга кўра, 179 киши ҳалок бўлган. Омон қолган икки киши – бир йўловчи ва экипаж аъзоларидан бири.

Шунингдек, Канаданинг PAL Airlines авиакомпаниясининг Сент-Жонсдан учиб келган самолёти Галифакс аэропортига фавқулодда қўнишни амалга оширди. Самолёт учиш-қўниш йўлагига қаноти билан урилганидан кейин ёниб кетган. Галифакс аэропорти самолёт билан содир бўлган воқеа туфайли вақтинча ёпилган. Самолётдаги барча йўловчилар ва экипаж аъзолари туширилган ва аэродромдан олиб кетилган. Йўловчилар ва экипаж аъзолари сони эса ҳозирча маълум эмас.

Бундан ташқари, ўша куни KLM Royal Dutch Airlines  авиакомпаниясининг Boeing 737-800 самолёти гидравлик тизимдаги носозлик туфайли Норвегияда фавқулодда қўнишга мажбур бўлганди. Рейс Ослодан Амстердамга йўл олган, бироқ Норвегия пойтахтидан 110 км жанубда жойлашган Сандефьорд аэропортига йўналтирилган. Муваффақиятли қўнганига қарамай, самолёт 18-қўниш йўлагидан чиқиб кетган ва ўтлоқ юзасида тўхтаб қолди. Самолёт бортида 182 киши, жумладан йўловчилар ва экипаж аъзолари бўлган. Ҳеч ким жабрланмаган.

30 декабрь куни эса Германиянинг Штутгарт шаҳрида тўрт ўриндиқли Cessna C-172 самолётининг қулаши оқибатида икки киши жабрланди. Учувчи енгил тан жароҳати олган, 70 ёшли йўловчи оғир аҳволда касалхонага ётқизилган. Ушбу йилнинг бошида ҳам Бразилиянинг Убатуба шаҳридаги Гастан-Мадейра аэропортида Cessna Aircraft бизнес-жети шаҳар соҳилида учиш-қўниш йўлагидан чиқиб кетди, оқибатда самолёт портлаганди.