Эрон уранни АҚШга эмас, Россияга топширмоқчи

Эрон маълум шартлар асосида бойитилган уранни Россияга топширишга рози бўлди. Бу ҳақда янгиланган келишув лойиҳасига таяниб, “Al Hadath” телеканали хабар берди.

Маълумотларга кўра, Теҳрон ядровий дастурини тўлиқ тугатиш ўрнига уни узоқ муддатга музлатишга рози бўлган. Бунинг эвазига тахминан 400 килограмм юқори бойитилган уран АҚШга эмас, балки Россияга топширилиши керак.

Телеканал манбасига кўра, Эрон уруш давомида етказилган зарар учун АҚШдан компенсация талабидан ҳам воз кечиши мумкин. Шу билан бирга, Теҳрон Вашингтондан иқтисодий имтиёзлар олишга интилмоқда.

Шунингдек, Эрон Ҳормуз бўғозини босқичма-босқич очишни таклиф қилган. Режага кўра, бўғоздаги эҳтимолий можароларни тартибга солишда Покистон ва Уммон кафолатли иштирок этади.

Эроннинг бойитилган урандан воз кечиши Вашингтоннинг Теҳронга қўйган асосий талабларидан бири ҳисобланади. Россия Ташқи ишлар вазири Сергей Лавров апрель ойида Москва “бойитилган уран масаласини ҳал қилишда ўз ролини ўйнашга тайёр” эканини билдирганди.

Эслатиб ўтамиз, АҚШ Президенти Дональд Трамп Эронга бугун, 19 май куни режалаштирилган ҳарбий ҳужумни кечиктирганини маълум қилганди. Трампнинг айтишича, ҳужумдан воз кечишни ундан Қатар Амири шайх Тамим бин Ҳамад Ол Соний, Саудия Арабистони Валиаҳди ва Бош вазири Муҳаммад бин Салмон Ол Сауд ҳамда БАА Президенти шайх Муҳаммад бин Зоид Ол Наҳаён сўраган.