Трамп Эронга режалаштирилган ҳужумни яна кечиктирди

АҚШ Президенти Дональд Трамп Эронга бугун, 19 май куни режалаштирилган ҳарбий ҳужумни кечиктирганини маълум қилди. У бу ҳақда Truth Social ижтимоий тармоғида ёзди.

Трампнинг айтишича, ҳужумдан воз кечишни ундан Қатар Амири шайх Тамим бин Ҳамад Ол Соний, Саудия Арабистони Валиаҳди ва Бош вазири Муҳаммад бин Салмон Ол Сауд ҳамда БАА Президенти шайх Муҳаммад бин Зоид Ол Наҳаён сўраган.

Унинг сўзларига кўра, ҳозирда “жиддий музокаралар” кетмоқда. Трамп бу музокаралар натижасида АҚШ, Яқин Шарқ давлатлари ва бошқа мамлакатлар учун “мақбул келишув”га эришилишини айтган.

Шунингдек, у бўлажак келишув Эроннинг ядровий қуролга эга бўлишини тақиқлашини таъкидлади.

Бироқ Трамп Пентагон раҳбари Пит Ҳегсет, Қуролли кучлар штаб бошлиқлари қўмитаси раиси Дэн Кейн ҳамда АҚШ армиясига “агар келишувга эришилмаса, исталган вақтда Эронга қарши кенг кўламли ҳужумга тайёр туриш” бўйича топшириқ берилганини ҳам билдирган.

“Reuters” агентлигининг ёзишича, бу вақтгача АҚШ 19 май куни Эронга зарба беришни режалаштиргани ҳақида очиқ маълумот бермаган.

18 май куни Эрон ТИВ вакили Теҳроннинг позицияси АҚШга Покистон орқали етказилганини айтган.

Эслатиб ўтамиз, аввалроқ АҚШ Эронга тинчлик музокараларини қайта бошлаш учун бажарилиши лозим бўлган 5 та талабдан иборат рўйхатни топширгани ҳақида хабар берилганди.

АҚШ қуйидаги шартларни илгари сурган:

• Вашингтон уруш оқибатида етказилган зарар учун Эронга ҳеч қандай компенсация тўламайди;
• Эрон 400 килограмм бойитилган уранни мамлакатдан олиб чиқиб, АҚШга топшириши керак;
• Мамлакатда фақат битта ишлаётган ядровий мажмуа қолдирилиши лозим;
• АҚШ музлатилган Эрон активларининг кўпи билан 25 фоизини озод қилади.