Эрон ўғилларимдан бирини ўлдиришга уринди – Нетаньяху

Исроил Бош вазири Биньямин Нетаньяху Эрон унинг ўғилларидан бирини ўлдиришга уринганини маълум қилди, бироқ қачон, қайси ўғли нишонга олингани ва суиқасд режаси қанчалик яқин амалга ошгани ҳақида маълумот бермади. Бу ҳақда у кеча, 24 август куни Исроилнинг “Channel 14” телеканалига берган телефон интервьюсида айтди.

Унинг сўзларига кўра, Эрон ўғилларидан бирини нишонга олган ва уни ўлдиришга уринган.

“Эрон ўғилларимдан бирини нишонга олди. Эрон ўғилларимдан бирини ўлдиришга уринди”, деган Нетаньяху.

Бош вазир қайси ўғли ҳақида гапираётганига аниқлик киритмаган. Унинг катта ўғли Яир Майамида яшайди. Эроннинг Нью-Йоркдаги БМТдаги ваколатхонаси Нетаньяхунинг айбловларига ҳозирча изоҳ бермаган.

Нетаньяху бу гапларни Исроилда 27 октябрда бўлиб ўтиши режалаштирилган умумий сайловлар олдидан айтди. Унинг коалицияси жамоатчилик фикри сўровларида ортда қолмоқда.

Шунингдек, Нетаньяху Шин Бет хавфсизлик хизмати раҳбари Давид Зинига бош вазирликка номзодларнинг барчасига тегишли хавфсизлик чораларини таъминлаш кераклигини айтганини билдирган.

Эслатиб ўтамиз, аввалроқ Исроил Бош вазири Биньямин Нетаньяху АҚШ Президенти Дональд Трамп билан очиқ зиддиятга киришишга тайёр экани айтилганди.