Эрон бир кечада ер билан яксон қилиниши мумкин – Трамп

АҚШ Президенти Дональд Трамп Эроннинг бир кеча ичида вайрон қилиниши мумкинлигини маълум қилди. Унинг сўзларига кўра, “ўша кеча эртагаёқ келиши мумкин”. Бу ҳақда Трамп бугун, 6 апрель куни Овал кабинетдаги матбуот анжуманида гапирди.

“Бутун мамлакат бир кечада йўқ қилиниши мумкин ва бу кеча эртага келиши мумкин”, дейди Трамп.

Дональд Трамп 3 апрель куни Эрон ҳудудида ҳалокатга учраган F-15E қирувчи самолёти учувчисини қутқариш бўйича АҚШ қандай операция ўтказгани ҳақида батафсил сўзлаб берган. У Эрондаги операцияда иштирок этаётган ҳар бир америкалик ҳарбий хизматчига миннатдорлик билдирган.

ОАВ ёзишича, кеча, 5 апрель куни Эрон ва АҚШ воситичилар орқали ўт очишни вақтинча тўхтатиш масаласини муҳокама қилган, шундан сўнг томонлар тинчлик ўрнатиш бўйича келишиб олишлари керак эди. Бироқ Эрон томони сулҳ ғоясини рад этган ва ҳарбий ҳаракатларни бутунлай тўхтатишни талаб қилган.

Эслатиб ўтамиз, жорий йилнинг 4 апрель куни Дональд Трамп, агар 48 соат ичида Эрон ҳукумати келишувга рози бўлмаса, Эронни “дўзах” кутаётгани билан таҳдид қилганди.