Эрон АҚШ билан кескинликни пасайтирмоқчи – NYT

Теҳрон халқаро майдондаги риторикасини кескин ўзгартирди ва АҚШда республикачи Дональд Трампнинг президентлик сайловларида ғалаба қозонганидан сўнг Вашингтон билан муносабатлардаги кескинликни пасайтиришга интилмоқда. Бу ҳақда кеча, 28 ноябрь куни ўз манбаларига таяниб, “The New York Times” хабар берди.

Нашрга кўра, Эрон сўнгги бир неча ҳафта ичида кескин баёнотлардан воз кечиб, уларни “муросага йўналтирилган” ёндашувлар билан алмаштирган. Нашр манбалари бу ўзгаришлар мамлакат ичида ва ундан ташқарида рўй бераётган воқеалар билан боғлиқлигини таъкидламоқда. Уларнинг сўзларига кўра, Теҳроннинг ёндашувини қайта кўриб чиқишга қарор қилиши 5 ноябрь куни Трампнинг сайловларда ғалаба қозонганидан келиб чиққан. Шунингдек, эронликлар Трампнинг “башорат қилиб бўлмас” сиёсатидан хавотирда экани айтилмоқда.

Бундан ташқари, Эрон сиёсатига иқтисодий инқироз ҳамда Теҳроннинг “яқин ва энг муҳим” ҳарбий иттифоқчиси – Ливандаги “Ҳизбуллоҳ” ҳаракатининг заифлашуви таъсир кўрсатган.

Шу омилларни ҳисобга олиб, Эрон Исроилга қарши жавоб зарбалари беришдан ҳам тийилишга қарор қилган.

Трамп ўзининг илк президентлик даврида Эронга нисбатан максимал босим сиёсатини эълон қилган. Хусусан, бу даврда Трамп Эронга қарши қаттиқ санкциялар жорий этган, ядровий келишувдан чиққан ва яҳудий давлатига ҳарбий-сиёсий ҳамда иқтисодий ёрдамни кучайтирганди. Теҳрон эса уни 2025 йил январь ойида Оқ уйга қайтгач, Эронга босим ўтказиш сиёсатидан воз кечишга чақирмоқда. Агар республикачи тескари қарор қабул қилса, АҚШ Эрондан “максимал қаршилик”ка дуч келади.

Эслатиб ўтамиз, аввалроқ Эрон Президенти Масъуд Пезешкиён Теҳрондаги матбуот анжуманида агар Вашингтон Теҳронга душман эмаслигини кўрсатса, Эрон АҚШ билан тўғридан тўғри музокаралар олиб бориши мумкинлигини айтган эди.