Эрдўған Трамп ва Путинни Истанбулда учраштирмоқчи

Туркия Президенти Ражаб Тойиб Эрдўған россиялик америкалик мавқедошлари Владимир Путин ва Дональд Трамп билан Украинадаги можаро бўйича Истанбулда учрашиш имкониятини муҳокама қилиш учун телефон орқали мулоқот ўтказиш режасини маълум қилди. Бу ҳақда Эрдўған журналистларга маълум қилди.

“Бу ҳафта Путин ва Трамп билан телефон орқали музокаралар олиб борганимиздан сўнг, Истанбулда лидерлар учрашувини ташкил қила оламизми, кўрамиз. Бу бизнинг вазифамиз”, деди у.

АҚШ Президенти Дональд Трамп эса бугун, 25 июль куни Оқ уйнинг жанубий майсазорида журналистлар билан суҳбатда Владимир Путин ва Украина Президенти Владимир Зеленский билан уч томонлама учрашув ўтказиши мумкинлигини айтди.

“Бу содир бўлади. Лекин бу уч ой олдин содир бўлиши керак эди”,  деди Трамп Путин ва Зеленский билан учрашув истиқболлари ҳақидаги саволга жавобан.

Эслатиб ўтамиз, аввалроқ Украина Россияга Президентлар Владимир Путин ва Владимир Зеленский ўртасидаги учрашувни август ойи охиригача Дональд Трамп иштирокида ташкил этишни таклиф қилган эди. Зеленскийнинг ўзи бу ҳақда июль ойи бошида айтиб, тинчликка эришиш учун юқори даражадаги музокаралар зарурлигини таъкидлаган эди.

Россия етакчисининг матбуот котиби Дмитрий Песков бундай учрашув эҳтимолини изоҳлар экан, юқори даражадаги музокаралар можарони ҳал қилишга ёрдам бериши мумкин бўлса-да, бу мураккаб жараённи тезда якунлаб бўлмаслигини айтди.

Россия музокаралар делегацияси раҳбари Владимир Мединский аввалроқ Россия ва Украина етакчиларининг учрашуви мамлакатлар ўртасидаги зиддиятни ҳал этишда якуний босқич бўлиши кераклигини, бироқ бунинг учун пухта тайёргарлик кўриш кераклигини таъкидлаган эди. Кремль, шунингдек, юқори даражадаги музокаралар фақат делегацияларнинг дастлабки иши ва аниқ келишувлар асосида амалга оширилиши мумкинлигини таъкидлади.