Эрдўған Самарқандда Путин билан нимани муҳокама қилмоқчилигини айтди

Туркия Президенти Ражаб Тойиб Эрдўған 15-16 сентябрь кунлари Самарқандда бўлиб ўтадиган Шанхай Ҳамкорлик Ташкилоти саммити доирасидаги учрашувда Россия етакчиси Владимир Путиндан Россиядан озиқ-овқат етказиб беришни бошлашни сўраш истагини билдирди. Унинг бу ҳақдаги гапларини маҳаллий NTV телеканали эфирга узатган. 

“Албатта, Самарқанддаги учрашувимиз чоғида ундан ушбу кемалар билан коридор орқали Россия товарларини жўнатишини сўраймиз.  

Агар Россия донлари кириб кела бошласа, биз Африканинг қашшоқ мамлакатларига етиб боргунимизча, бу донни, бошқа маҳсулотларни ва ҳамма нарсани жўнатгунимизча, биз уни энг идеал тарзда ташкил қиламиз ва маълум бир тизимга бирлаштирамиз. Мен у билан буни очиқ муҳокама қилишни интиқлик билан кутаман, чунки Африкада қийин вазиятда бўлган кўплаб давлатлар бор ва биз бу мамлакатлар билан боғланиб, бу маҳсулотларни имкон қадар тезроқ уларга жўнатишимиз керак”, дейди Эрдўған.

Эрдўған Россияга Россия товарларини жўнатмасликни таклиф қилди, чунки дон йўлаги орқали ўтувчи кемалар камбағалларга эмас, ривожланган ёки ривожланаётган мамлакатларга жўнатилади.

Эслатиб ўтамиз, Путин 7 сентябрь куни Шарқий иқтисодий форумдаги нутқида Украина дони дастлаб айтилганидек асосан ночор ва ривожланаётган давлатларга эмас, Европанинг ривожланган мамлакатларига жўнатилаётганини қоралаганди. РФ Президенти бу масалани Эрдўған билан муҳокама қилишини таъкидлади.

Маълумот учун, жорий йилнинг 22 июль куни Туркиянинг Истанбул шаҳрида Туркия Республикаси Президенти Ражаб Тойиб Эрдўған, Бирлашган Миллатлар Ташкилоти Бош котиби Антониу Гутерриш, Туркия Миллий Мудофаа вазири Ҳулуси Акар, Россия Миллий Мудофаа вазири Сергей Шойгу ва Украина Инфратузилма вазири Александр Кубраков иштирокида “Дон йўлаги” ҳужжати имзоланди. Украинадан ғалла экспорти бўйича келишув Одесса, шунингдек, Черноморск ва Южнийдан хавфсиз йўлакларни яратишни назарда тутади. Ушбу келишув жаҳон бозорларига камида 25 миллион тонна дон етказиб бериш имконини беради.

Келишув кучга кирганидан кейин август ойида Украина портларидан 1,67 миллион тоннадан ортиқ озиқ-овқат экспорт қилинди.