Эрдўған билан ярашиб олган Алиев рафиқаси билан Туркияга борди

Бугун, 10 ноябрь куни Озарбайжон Республикаси Президенти Илҳом Алиев Туркия Республикаси Президенти Ражаб Тойиб Эрдўғаннинг таклифига биноан БМТнинг Иқлим ўзгариши бўйича ҳадли конвенцияси томонлари анжуманининг 31-сессияси (COP31) Етакчилар саммитида иштирок этиш учун Туркияга борди. Бу ҳақда APA хабар берди.

Қайд этилишича, Анталья Халқаро аэропортида Озарбайжон раҳбари шарафига фахрий қоровул саф тортиб турган. Президент Илҳом Алиев ва биринчи хоним Меҳрибон Алиевани Туркий давлатлар ташкилоти (ТДТ) Оқсоқоллар кенгаши раиси Бинали Йилдирим, ҳукмрон Адолат ва тараққиёт партиясининг (AK Parti) Туркий дунё билан алоқалар бўйича раис ўринбосари, Туркия Буюк миллат мажлиси аъзоси Куршад Зорлу, Туркия Буюк миллат мажлисининг Ташқи алоқалар комиссияси раиси Фуат Октай, Туркия Буюк миллат мажлиси аъзоси Мавлуд Човушоғлу, Анталья шаҳри губернатори Хулуси Шаҳин ва бошқа расмий шахслар кутиб олган.

Инқироз ва араз 

Жорий йилнинг октябрь ойида Озарбайжондаги мактабларда рўмол билан боғлиқ можаролар чиқди. Рўмолли ўқувчи-қизларнинг мактаб, университетларга киритилмаётгани, ўқитувчиларнинг ишдан четлаштирилиши ижтимоий тармоқларда катта баҳсларга сабаб бўлди. Ушбу воқеалар ортидан туркиялик бир қатор сиёсатчилар, жамоатчилик вакиллари, журналистлар Озарбайжон раҳбариятига нисбатан кескин баёнотлар билан чиқди. Озарбайжон Президенти Илҳом Алиев ҳам ўз нутқида Қорабоғ урушида Озарбайжоннинг ёнида туриб, унга ёрдам бермаганларнинг Бакунинг ички ишларига аралашишга ҳаққи йўқлигини айтди. Алиев ўз сўзида муайян бир давлат номини тилга олмаган бўлса-да, кўпчилик бу гаплар Туркия аталганини тахмин қилди. Кун сайин авж олган инқирозли вазият фонида Озарбайжон туркиялик 31 кишини мамлакатда исталмаган шахслар рўйхатига киритди, Алиев 29-30 октябрь куни Анқарада ўтадиган Туркий давлатлар ташкилотининг навбатдаги саммитида иштирок этишдан бош тортди. Эрдўғаннинг ўзи қўнғироқ қилса-да, у саммитга келмади, ўрнига Ташқи ишлар вазири Жайҳун Байрамовни юборди. 

Туркия Президенти Эрдўғаннинг маслаҳатчиси Оқтой Сарал ҳам Озарбайжоннинг мактаб формаси сиёсатини танқид қилганидан кейин лавозимидан четлатилди. Бу қарор Анқара Баку билан муносабатларни кескинлаштиришдан кўра, уларни юмшатишга интилаётганини кўрсатди. Буни ҳам кам деб билган Эрдўған, 8 ноябрь куни рафиқаси билан Қорабоғга борди.