Эрдўған аразлаган Алиевни Анқарага таклиф қилди

Туркия Президенти Ражаб Тойиб Эрдўған Озарбайжон Президенти Илҳом Алиев билан телефон орқали мулоқот қилди. У Алиевни Анқарада бўлиб ўтадиган Туркий давлатлар ташкилотининг 13-саммитига таклиф қилди. Бу ҳақда Туркия Президентининг коммуникациялар бошқармаси маълум қилди.

Қайд этилишича, суҳбатда Туркия ва Озарбайжон ўртасидаги икки томонлама муносабатлар, шунингдек, минтақавий ва глобал воқеалар муҳокама қилинган.

Эрдўған Туркия ва Озарбайжон ўртасидаги ҳамкорлик биродарлик муносабатларига асосланганини билдириб, уни янада ривожлантириш муҳимлигини айтган. Унинг сўзларига кўра, икки давлат биродарлик ришталаридан куч олиб, ҳамкорликни янада юқори босқичга олиб чиқади.

Шунингдек, Туркия Президенти Озарбайжон мустақиллигининг 35 йиллиги билан Илҳом Алиевни яна бир бор табриклаган. Эрдўған Алиевни жорий йилнинг 29–30 октябрь кунлари Анқарада ўтказиладиган Туркий давлатлар ташкилотининг 13-саммитида иштирок этишга таклиф қилган.

Икки давлат раҳбарининг мулоқоти Озарбайжон мактабларида рўмол ўрашга қўйилган чекловлар сабаб Туркия ва Озарбайжон ўртасида келишмовчиликлар юзага келган бир пайтда бўлиб ўтган. Туркияда ушбу чекловлар танқид қилинган, бунга жавобан Баку маъмурияти ҳам ўз муносабатини билдирган эди. Оқибатда икки давлат ўртасидаги муносабатларда таранглик юзага келганди.

Маълумот учун, Туркий давлатлар ташкилотининг 13-саммити 29-30 октябрь кунлари Анқарада бўлиб ўтади.

Эслатиб ўтамиз, аввалроқ Озарбайжон Туркиянинг 31 нафар фуқаросини “номақбул шахслар” деб эълон қилгани ва уларга мамлакатга киришни тақиқлагани ҳақида хабар берилган эди.