Эндрик топ-5 лига рекордини ўрнатди

“Лион”нинг 19 ёшли бразилиялик ҳужумчиси Эндрик Европанинг кучли бешлик лигаларида хет-трик қайд этган XXI асрнинг энг ёш бразилиялик футболчиси сифатида тарихга кирди. Бу ҳақда “digisport” нашри хабар берди.  

Ушбу рекорд Франция чемпионатининг 19-тури доирасида “Мец”га қарши баҳсда қайд этилди. Жорий йилнинг 25 январь куни бўлиб ўтган учрашувда “Лион” 5:2 ҳисобида ғалаба қозонди. Эндрик 11-, 45+1- ва 87-дақиқаларда гол уриб, ўйиннинг энг яхши футболчисига айланди. 

Шу тариқа, у бразилиялик афсона Роналдо Назарио натижасини ортда қолдирди. Роналдо 1996 йил 26 октябрда, 20 ёшида “Барселона” сафида “Валенсия”га қарши ўйинда (3:2) хет-трик қайд этган эди.

Маълумот учун, жорий мавсумда Эндрикнинг ҳисобида 4 та гол ва 1 та голли узатма бор. Бразилиялик футболчи “Реал Мадрид”дан “Лион” клубига ижара асосида ўтган бўлиб, унинг шартномаси 2026 йил июнь ойигача амал қилади. Француз клуби футболчи маошининг 50 фоизини қопламоқда.