Энди порахўрлар жазодан муддатидан олдин озод қилинмайди

north_east

Ўзбекистонда коррупционерларнинг очиқ рўйхати тузилади

Энди Ўзбекистонда коррупцион жиноятда айбланган, хусусан ўзлаштириш ёки растрата йўли билан талон-торож қилиш билан жазога ҳукм қилинганлар етказилган зарарнинг ўрнини тўлиқ қопламагунигача жазодан муддатидан илгари шартли равишда озод қилинмайди. Бу жорий йилнинг 22 июнь куни қабул қилинган “Ўзбекистон Республикасининг айрим қонун ҳужжатларига коррупцияга қарши курашиш самарадорлигини оширишга, коррупцияга оид жиноятлар учун жавобгарлик муқаррарлигини таъминлашга қаратилган қўшимча ва ўзгартиришлар киритиш тўғрисида”ги Ўзбекистон Республикаси қонунида акс этган. 

Қонун билан Жиноят кодексининг қатор моддаларига ўзгартириш ва қўшимчалар киритилди. Хусусан, Кодекснинг 73-моддаси (Жазони ўташдан муддатидан илгари шартли озод қилиш)га киритилган “в¹” бандга кўра, эндиликда ўзлаштириш ёки растрата қилиш йўли билан талон-торож қилганлик, шунингдек фирибгарлик учун ҳукм қилинган ва содир этган жинояти туфайли етказилган зарарнинг ўрнини тўлиқ қопламаган шахс етказилган зарарнинг ўрнини тўлиқ қопламагунигача жазодан муддатидан илгари шартли равишда озод қилинмайди. 

Қолаверса, ушбу модданинг “г” банди ҳам “такроран ёки хавфли рецидевист томонидан ёхуд жуда кўп миқдорда пора олиш, пора бериш, пора олиш-беришда воситачилик қилганлик” мазмунида тўлдирилиб, ушбу айблов билан ҳукм қилинган шахслар ҳам жазодан муддатидан илгари шартли равишда озод қилинмаслиги белгиланди. 

Маълумот ўрнида, жорий йилнинг 25 май куни Олий Мажлис Сенати томонидан маъқулланган, 22 июнь куни Президент имзолаган ушбу Қонун расмий эълон қилинган кундан бошлаб кучга кирди. 

Эслатиб ўтамиз, 2025 йилнинг ноябрь ойида лавозимидан озод этилиб, 2026 йилнинг январида Ички ишлар вазирлиги тизимида давлат харидларида 186 миллиард сўм бюджет маблағи ўзлаштирилганликда айбланган собиқ вазир ўринбосари Бекмурод Абдуллаев жорий йилнинг апрель ойи ўрталарига келиб, озодликка чиққани маълум бўлди. Расман тасдиқланмаган маълумотларга кўра, собиқ мулозим етказилган зарарни қоплаган.